मोटरसाइकल दुर्घटनामा दुईको मृत्यु, एक गम्भीर घाइते

जनकपुर । तीन जना सिवार भएको मोटरसाइकल दुर्घटना हुँदा धनुषामा दुई किशोरको ज्यान गएको छ भने एकजना गम्भीर घाइते भएका छन् ।

कमला नगरपालिका–२ खोक्साहा पुल नजिक बिहीबार राति साढे १० बजे नम्बर नखुलेको मोटरसाइकल दुर्घटना हुँदा जनकनन्दिनी गाउँपालिका–५ बनरझुलाका १८ वर्षीय अमित यादव र १६ वर्षीय कुश मिश्रको घटनास्थलमै मृत्यु भएको जिल्ला प्रहरी कार्यालय धनुषाले जनाएको छ ।

मोटरसाइकलको पछाडि सवार १७ वर्षीय राहुल महतो गम्भीर घाइते भएका छन् । उनको जनकपुर प्रादेशिक अस्पतालमा उपचार भइरहेको छ ।

प्रहरीका अनुसार उनीहरू कमला नगरपालिका–३ लगमा बजारमा आयोजना भइरहेको झिझिया नाच हेर्न जाँदै गर्दा दुर्घटनामा परेका हुन् । तीव्र गतिको कारण दुर्घटना भएको आशंका गरिएको छ ।

घटनाबारे थप अनुसन्धान भइरहेको प्रहरीले जनाएको छ ।