नेपाली कांग्रेसभित्र महाधिवेशनको टुंगो अझै अनिश्चित

तत्काल विशेष महाधिवेशन गरौँः गगन, पार्टी फुटेको म हेर्न सक्दिनँः देउवा

काठमान्डु । नेपाली कांग्रेसभित्र बढ्दै गएको आन्तरिक विवाद अन्त्य हुने संकेत अहिलेसम्म स्पष्ट देखिएको छैन । बिहीबार साँझ सभापति शेरबहादुर देउवाको बुढानीलकण्ठस्थित निवासमा भएको छलफलमा महामन्त्री गगनकुमार थापाले देउवालाई विशेष महाधिवेशन नै पार्टी र मुलुकका लागि हितकारी हुने सुझाव दिएका थिए ।

छलफलमा सहभागी एक पदाधिकारीका अनुसार थापाले सभापतिलाई भनेका थिए, “संस्थापनले नै नियमित महाधिवेशन सम्भव छैन भनेको छ । डेढ महिनादेखि यही विषयमा कुरा भइरहेको छ । तपाईंले नै विशेष महाधिवेशन गरिदिनुभयो भने पार्टी, देश र तपाईंको समेत हित हुन्छ ।”

थापाको आग्रहपछि देउवाले उक्त प्रस्तावबारे विचार गर्ने संकेत दिए । ती पदाधिकारीका अनुसार देउवाले भने, “सल्लाह गरेर अघि बढौँ । तर विशेष महाधिवेशन भने हुँदैन । त्यसले पार्टी फुट्न सक्छ । म पार्टी फुटेको हेर्न सक्दिनँ। सहमतिमै जाने हो ।”

छलफलमा देउवा, उपसभापति पूर्णबहादुर खड्का, महामन्त्रीद्वय गगन थापा र विश्वप्रकाश शर्मा, तथा नेता रमेश लेखक उपस्थित थिए ।

बैठकमा नेता लेखकले नियमित महाधिवेशनको क्यालेन्डर ल्याउनुपर्ने भन्दै एक शर्त राखे । “पहिले नियमित महाधिवेशनको समयसूची ल्याऔँ । त्यो आएपछि विशेषको निवेदन फिर्ता गर्नु नपर्ला, तर विशेष हुँदैन भन्ने ग्यारेन्टी चाहिन्छ,” उनले भने ।

तर दुवै महामन्त्रीले लेखकको प्रस्तावप्रति शंका व्यक्त गर्दै अस्वीकार गरे । महामन्त्री शर्माले “न नियमित हुन्छ भन्ने, न विशेष नगर्ने ग्यारेन्टी दिने” प्रकारको प्रस्ताव व्यवहारिक नभएको बताए । उनको भनाइमा, “नियमित क्यालेन्डर ल्याएर मात्रै महाधिवेशन टुंगो हुन्छ । अहिलेका लागि विशेषबाहेक विकल्प छैन ।”

असोज २८ गतेदेखि जारी कांग्रेस केन्द्रीय समिति बैठकले नियमित कि विशेष—महाधिवेशन कुन गर्ने भन्ने विषयमा अझै निर्णय गर्न सकेको छैन । दुई महामन्त्री विशेष महाधिवेशनकै पक्षमा छन्, किनकि ५४ प्रतिशतभन्दा बढी महाधिवेशन प्रतिनिधिले विशेष महाधिवेशन माग गरिरहेको छ । तर देउवा समूह भने फागुन २१ को निर्वाचनपछि मात्र महाधिवेशन गर्नुपर्ने अडानमा छ ।

यही विषयमा सहमति खोज्न उपसभापति खड्काले बैठक निरन्तर सार्दै आएका छन् । उनले सहमति नभएसम्म बैठक अघि नबढाउने बताउँदै आएका छन् ।