आज अस्ताउँदो सूर्यलाई अर्घ दिएर मनाइँदै छठ पर्व

काठमाडौं । आस्थाको महान् पर्व छठको मुख्य दिन आज साँझ अस्ताउँदो सूर्यलाई अर्घ दिई श्रद्धा, भक्ति र शुद्धतासँग पूजा आराधना गरिँदैछ । चारदिनसम्म मनाइने यो पर्वमा सूर्य देवता र उनकी पत्नी ऊषाको आराधना गरी परिवारको सुख, शान्ति र समृद्धिको कामना गरिन्छ ।

अस्ताउँदो सूर्यलाई अर्घ, भोलि बिहान उदाउँदो सूर्यको पूजा
छठ पर्वको विशेषता भनेकै अस्ताउँदो र उदाउँदो दुवै सूर्यलाई अर्घ दिने परम्परा हो । आज साँझ अस्ताउँदो सूर्यलाई जलाशय किनारमा पूजा आराधना गरी अर्घ दिइन्छ भने भोलिपल्ट बिहान उदाउँदो सूर्यलाई अर्घ दिएपछि पर्व औपचारिक रूपमा सम्पन्न हुन्छ । आजको दिनलाई सरकारले सार्वजनिक बिदा समेत दिएको छ, जसका कारण देशभर पूजाआर्चनामा सहभागी हुनेको भीड बढ्ने अपेक्षा गरिएको छ ।

राजधानीका नदी किनार र पोखरीमा पूजाको तयारी
अस्ताउँदो सूर्यलाई अर्घ दिने तयारी अन्तिम चरणमा पुगेको छ । काठमाडौंका गौरीघाट, कमलपोखरी, विष्णुमती, नख्खु, गहनापोखरी, कुपण्डोललगायत स्थानहरूमा विशेष पूजास्थल निर्माण गरिएको छ । श्रद्धालुहरू साँझपख नदी तथा पोखरी किनारमा जम्मा भई दीपदान र भजनकीर्तन गर्ने तयारीमा छन् ।

छठको आध्यात्मिक महत्त्व
छठ पर्व मूलतः तराई क्षेत्रमा अत्यधिक श्रद्धा र उल्लासका साथ मनाइन्छ । तर पछिल्ला वर्षहरूमा यो पर्व पहाडी र हिमाली क्षेत्रका समुदायबीच पनि विस्तार हुँदै गएको छ । यसले देशभर धार्मिक सहिष्णुता, सामाजिक एकता र सद्भाव बलियो बनाउन योगदान पुर्‍याएको देखिन्छ ।

व्रत र शुद्धताको प्रतीक
छठको व्रत गर्नेहरू कार्तिक शुक्ल चतुर्थीदेखि नै चोखो खानपान र शुद्ध जीवनशैली अपनाउँछन् । कतिपय ब्रतालुहरूले कोजाग्रत पूर्णिमाको भोलिपल्टदेखि नै लसुन, प्याजलगायत तामसी खाद्यपदार्थ त्यागी सात्विक भोजन मात्र ग्रहण गर्छन् । यो पर्वलाई अत्यन्तै पवित्र र शुद्धताको प्रतीकका रूपमा लिने गरिन्छ ।

जनविश्वास र धार्मिक आस्था
छठ पर्व विधिपूर्वक सम्पन्न गर्नाले मनोवाञ्छित फल प्राप्त हुने, परिवारमा सुख, शान्ति र समृद्धि आउने जनविश्वास रहँदै आएको छ । साथै, यस पर्वले आत्मशुद्धि, संयम र अनुशासनको सन्देश पनि दिन्छ ।

आज रातभर जाग्राम बसेर भोलि बिहान उदाउँदो सूर्यलाई अर्घ दिएपछि छठ पर्व सम्पन्न हुनेछ । राजधानीका नदी किनार र पोखरीहरू अहिले आस्था र भक्ति झल्किने स्थलमा परिणत भएका छन् ।