प्रधानमन्त्री कार्कीले गरे महावीर पुनलाई मन्त्री बन्न प्रस्ताव

काठमाडौं । प्रधानमन्त्री सुशीला कार्कीले वैज्ञानिक तथा सामाजिक अभियन्ता डा. महावीर पुनलाई मन्त्री बन्न प्रस्ताव गरेकी छन् ।

मन्त्रिपरिषद् विस्तारको तयारीमा रहेकी कार्कीले पुनसँगै केही युवा पत्रकारहरूसँग पनि छलफल गरेकी थिइन् । छलफलका क्रममा उनले पुनलाई शिक्षा, विज्ञान तथा प्रविधि मन्त्री बन्न आग्रह गरेको स्रोतले जनाएको छ । तर, पुनले यसबारे कुनै स्पष्ट प्रतिक्रिया दिएका छैनन् । पत्रकारको जिज्ञासामा उनले छोटकरीमा भने, ‘यो अहिले बोल्ने कुरा होइन ।’

जेनजी आन्दोलनपछि तत्कालीन केपी शर्मा ओलीको पतन भई बनेको अन्तरिम सरकारमा हाल तीनजना मात्र मन्त्री रहेका छन् । भदौ २७ गते प्रधानमन्त्रीमा नियुक्त भएकी कार्कीले अर्थमन्त्रीमा रामेश्वर खनाल, ऊर्जा तथा भौतिक पूर्वाधारमा कुलमान घिसिङ र गृह तथा कानुन मन्त्रालयमा ओमप्रकाश अर्याललाई जिम्मेवारी दिएकी छिन् ।

पुनलाई सरकारमा समेट्नुपर्ने आवाज जेनजी आन्दोलनमा सक्रिय युवा पुस्ताबाट बलियोसँग उठिरहेको छ । नेपालमा पहिलोपटक ताररहित इन्टरनेट सेवा सञ्चालन गरी रोमन म्यागासेसे पुरस्कार प्राप्त गरेका पुन हाल राष्ट्रिय आविष्कार केन्द्रका संस्थापक हुन् ।

सन् २०१२ मा स्थापना भएको उक्त केन्द्रमार्फत उनले सूचना प्रविधि र आविष्कारमार्फत देशको विकासमा योगदान पुर्‍याइरहेका छन् । वर्षौंदेखि बन्द रहेको कृषि औजार कारखानालाई पनि उनले सञ्चालनमा ल्याएका छन् । हालै आफ्नै पुस्तक बिक्रीमार्फत उनले कारखाना सञ्चालनका लागि रकम संकलन गरेका थिए ।