जेन–जी आन्दोलनमा मारिएका ४५ जनालाई शहीद घोषणा गर्ने सरकारको निर्णय

काठमाडौं । सरकारले भदौ २३ र २४ गतेको जेन–जी आन्दोलनका क्रममा ज्यान गुमाउने ४५ जनालाई राज्यको तर्फबाट शहीद घोषणा गर्ने निर्णय गरेको छ । सोमबार सिंहदरबारमा बसेको मन्त्रिपरिषद् बैठकपछि सरकारका प्रवक्ता तथा सञ्चार–सूचना प्रविधिमन्त्री जगदीश खरेलले उक्त जानकारी दिएका हुन् ।

मन्त्री खरेलका अनुसार काठमाडौंसहित देशका विभिन्न स्थानमा आन्दोलनका क्रममा ज्यान गुमाउने ती व्यक्तिहरूको सूची गृह मन्त्रालय र सरोकारवाला निकायहरूको संयुक्त अध्ययनपछि तयार गरिएको हो । उनले भने, “हालसम्म ४५ जनालाई शहीदको सूचीमा राखिएको छ । बाँकी घटनाबारे थप अध्ययन र प्रमाण संकलन जारी छ ।”

बैठकले बेपत्ता पारिएका व्यक्तिको छानबिन, सत्यनिरुपण तथा मेलमिलाप कोष नियमावली २०८२ लाई स्वीकृत गरेको छ । सोसँगै सरकारले हालै विपद् संकटग्रस्त जिल्ला घोषित इलामका स्थानीय तहहरूलाई सहयोग पुर्‍याउनका लागि ५ करोड ३० लाख रुपैयाँ विपद् व्यवस्थापन कोषमार्फत उपलब्ध गराउने निर्णयसमेत गरेको छ ।

त्यस्तै, मन्त्रिपरिषद्ले वैदेशिक रोजगार न्यायाधिकरणको सदस्यमा सहन्यायाधीवक्ता घनश्याम ओझालाई नियुक्त गर्ने निर्णय पनि गरेको छ ।

सरकारले जेन–जी आन्दोलनका क्रममा मारिएका नागरिकहरूलाई शहीदको मान्यता दिएपछि सम्बन्धित परिवारलाई राज्यको संरक्षणमा ल्याउने तयारी पनि गरिरहेको प्रवक्ता खरेलले जानकारी दिए । उनका अनुसार शहीद परिवारका लागि विशेष राहत र पुनर्स्थापनाको व्यवस्था गर्ने गृह मन्त्रालयलाई जिम्मेवारी दिइएको छ ।