भारत भ्रमणमा रवि लामिछाने, भाजपाका शीर्ष नेतासँग भेटवार्ता गर्ने

काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछाने आजदेखि पाँच दिने औपचारिक भ्रमणका लागि भारत प्रस्थान गर्दै छन् । उनी भारतीय जनता पार्टी (भाजपा) का अध्यक्ष नितिन नवीनको निमन्त्रणामा जेठ २२ गतेसम्म भारतमा रहने कार्यक्रम छ ।

रास्वपाका प्रवक्ता मनिष झाले जारी गरेको विज्ञप्तिअनुसार भ्रमणका क्रममा लामिछानेले नयाँ दिल्लीमा उच्चस्तरीय राजनीतिक तथा कूटनीतिक भेटघाट गर्नेछन् । उनले भाजपाका वरिष्ठ नेताहरूसँग द्विपक्षीय सम्बन्ध, राजनीतिक सहकार्य र आपसी चासोका विषयमा छलफल गर्ने कार्यसूची रहेको बताइएको छ ।

भ्रमण अवधिमा लामिछानेले भारतमा रहेका नेपाली समुदाय तथा रास्वपाका शुभेच्छुकहरूसँग अन्तरक्रिया गर्ने कार्यक्रमसमेत तय गरिएको छ । साथै उनले अयोध्याको व्यक्तिगत भ्रमण पनि गर्नेछन् ।

भारत भ्रमणमा लामिछानेको नेतृत्वमा पाँच सदस्यीय प्रतिनिधिमण्डल सहभागी हुनेछ । टोलीमा रास्वपाका सह–महामन्त्री तथा प्रतिनिधिसभा सदस्य विपिन कुमार आचार्य, सचिवालय सदस्य एवं सांसद दीपक बोहोरा, निकिता पौडेल र प्रदीप आचार्य रहेका छन् ।

रास्वपाका अनुसार भ्रमणका विभिन्न कार्यक्रम तथा उच्चस्तरीय भेटघाटको व्यवस्थापनका लागि नेपाली दुतावास नयाँ दिल्लीले आवश्यक समन्वय र सहजीकरण गरिरहेको छ ।