भदौ १८ बाट आईजीपी थापा अवकाश हुँदै, खापुङ एकल दाबेदारका रूपमा अगाडि

काठमाडौं । हालका प्रहरी महानिरीक्षक (आईजीपी) दीपक थापा यसै भदौ १८ गते अनिवार्य अवकाशमा जाने भएपछि ३२औँ आईजीपीको आकांक्षी कसलाई बनाइने भन्ने विषयमा बहस सुरु भएको छ । हालसम्म प्रहरी अतिरिक्त महानिरीक्षक (एआईजी) चन्द्रकुवेर खापुङ एकल दाबेदारका रूपमा अगाडि देखिएका छन् ।

थापाले ३० वर्षे सेवा अवधि पूरा गरेसँगै आगामी भदौ १८ बाट अवकाश लिँदै छन् । उनले २०५२ साल भदौ १९ गते प्रहरी निरीक्षकबाट सेवा प्रवेश गरेका थिए भने २०८१ चैत ४ मा ३१औँ प्रहरी प्रमुखको रूपमा नियुक्त भएका थिए ।

यसअघि संसद्मा छलफलरत नयाँ प्रहरी ऐन पास भएको भए थापाको कार्यकाल कम्तीमा ६ महिना थप हुने सम्भावना थियो । तर राज्य व्यवस्था तथा सुशासन समितिमा रहेको कुलिङ पिरियडसम्बन्धी विवाद उत्पन्न भएपछि उक्त विधेयकको प्रक्रिया रोकिएको छ ।

अवकाश समय नजिकिँदै गर्दा नयाँ आईजीपीका आकांक्षीका रूपमा खापुङ सिंहदरबारदेखि भद्रकालीसम्म चर्चाको केन्द्रमा आउन थालेका छन् । उनले २०५२ कार्तिक २७ मा प्रहरी निरीक्षक पदमा नियुक्ति लिएका थिए । सोही ब्याचका वसन्त कुँवर र दीपक थापा पहिले नै आईजीपी भइसकेका छन् भने खापुङ तेस्रो लटबाट उनीहरूसँगै भर्ना भएका अफिसर हुन् ।

खापुङले प्रहरी प्रशासन शाखादेखि अनुसन्धानसम्मका विभिन्न जिम्मेवारी सम्हालेका छन् । एसपी हुँदा प्रधान कार्यालयको कर्मचारी प्रशासन शाखामा बसेर उनी व्यवस्थापन क्षमतामा अब्बल ठहरिएका थिए । एसएसपी हुँदा उपत्यका अपराध अनुसन्धान कार्यालयको कमान्ड गर्दै उनले ठूला अपराधहरूमाथि कडा निगरानी राखेका थिए । पछि डिआइजीको रूपमा उनले कोशी प्रदेशको कमान्ड सम्हाले ।

यस वर्ष वैशाख १६ मा उनी एआईजीमा बढुवा भएका थिए । एआईजीमा बढुवा भएका ६ जनामध्ये खापुङ मेरिट लिस्टको पहिलो नम्बरमा परेका थिए । उनीसँगै बढुवा भएका दानबहादुर कार्की, राजन अधिकारी र डा. मनोज कुमार केसी पछिल्लो ब्याचका भएकाले आईजीपी दौडमा छैनन् ।

एआईजी लालमणि आचार्य उमेरहदका कारण जेठ १० मै अवकाश भइसकेका छन् भने एआईजी कृष्णहरि शर्मा पोखरेल भदौ १५ मा सेवा निवृत्त हुँदैछन् । यस्तो अवस्थामा खापुङ ३२औँ आईजीपीका लागि हालसम्मका एकल प्रतिस्पर्धीका रूपमा उभिएका छन् ।

आईजीपी थापाको अवकाशसँगै रिक्त हुँदै गरेको सर्वोच्च प्रहरी पदमा चन्द्रकुवेर खापुङकै नाम सर्वाधिक अगाडि आएको छ । अब गृह मन्त्रालयले सिफारिस गर्ने नाम र मन्त्रिपरिषद्ले लिने निर्णयले नेपाल प्रहरीको नयाँ नेतृत्व तय गर्नेछ ।