पश्चिमी वायुको प्रभाव कायम, केही पहाडी क्षेत्रमा हल्का वर्षाको सम्भावना

काठमाडौं । हाल नेपालमा पश्चिमी वायुको प्रभाव निरन्तर सक्रिय रहेकाले केही पहाडी तथा हिमाली क्षेत्रमा हल्का वर्षा हुने सम्भावना रहेको जल तथा मौसम विज्ञान विभागले जनाएको छ । विभागका अनुसार देशका अधिकांश पहाडी भू–भागमा आंशिक बदली रहनुका साथै धेरैजसो स्थानमा मौसम सफा रहने अनुमान गरिएको छ ।

कोशी र गण्डकी प्रदेशका उच्च पहाडी क्षेत्रमा एक–दुई स्थानमा हल्का वर्षा र हिमपात हुने सम्भावना समेत रहेको विभागको भनाइ छ ।

यसअघि बङ्गालको खाडीमा विकसित ‘मोन्था’ नामक चक्रवातका कारण देशका विभिन्न स्थानमा अविरल वर्षा भएको थियो, जसका कारण जनजीवन केही दिन प्रभावित बनेको थियो । हिमाली क्षेत्रमा वर्षासँगै हिउँसमेत परेको र त्यसले यातायात तथा पर्यटन गतिविधिमा असर पारेको जनाइएको छ ।

हिमपातकै कारण मनाङको डिस्याङ गाउँपालिका–९ स्थित तिलिचो तालको आधार शिविरमा १३ जना आन्तरिक तथा विदेशी पर्यटक अलपत्र परेका थिए । उनीहरूको उद्धार सशस्त्र प्रहरी बल अन्तर्गतको पर्वतीय उद्धार तालिम केन्द्र, मनाङको टोलीले गरेको हो ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार कात्तिक १५ गते बिहानदेखि १६ गते बिहानसम्म देशभरका ३०१ वर्षा मापन केन्द्रमा वर्षाको अभिलेख गरिएको थियो । तीमध्ये १८५ केन्द्रमा उल्लेख्य मात्रामा वर्षा मापन भएको हो ।

सबैभन्दा बढी वर्षा लमजुङको बेंसीशहरमा ७१.१ मिलिमिटर रेकर्ड गरिएको थियो भने चार वटा केन्द्रमा ५० मिलिमिटरभन्दा बढी वर्षा भएको तथ्यांक प्राधिकरणले सार्वजनिक गरेको छ ।