बाढी–पहिरोले देशभरका सडक प्रभावित, सात राष्ट्रिय राजमार्ग पूर्णरूपमा अवरुद्ध

काठमाडौं । लगातारको वर्षासँगै आएको बाढी र पहिरोका कारण देशका विभिन्न राष्ट्रिय राजमार्ग तथा मुख्य सडकखण्डमा यातायात प्रभावित भएको छ । सडक विभागका अनुसार काठमाडौं उपत्यका जोड्ने पृथ्वी, बीपी र कान्ति राजमार्गसहित सात राष्ट्रिय राजमार्गमा यातायात पूर्णरूपमा अवरुद्ध भएको छ भने अन्य केही सडकमा एकतर्फी तथा आंशिक रूपमा सवारी सञ्चालन भइरहेको छ ।

पूर्व–पश्चिम राजमार्गअन्तर्गत मकवानपुरको रजैयामा पहिरो खसेपछि सडक एकतर्फी सञ्चालनमा छ । पहिरो हटाएर दुवैतर्फी यातायात सञ्चालन गर्ने प्रयास भइरहेको विभागले जनाएको छ ।

पृथ्वी राजमार्गअन्तर्गत धादिङको कृष्णभीर, तिङ्ग्राङखानी, बाङ्गे र चालिसेमा पहिरो खस्दा सडक दुवैतर्फ अवरुद्ध भएको छ । पहिरो हटाउने काम जारी रहेको प्रहरीले जनाएको छ । यस्तै, नारायणघाट–मुग्लिन सडकखण्डको नाम्सी खोला पुलमा लेदोसहितको पहिरो खसेपछि सडक बन्द भएको छ । सडक डिभिजन कार्यालय भरतपुरका अनुसार अवरोध हटाउने काम भइरहेको छ ।

बीपी राजमार्गका माम्ती, पिप्ले, दाउन्ने–कालोपुल, चारसयबेँसी, कटुन्जे र चौकीडाँडालगायत स्थानमा पहिरो तथा बाढीले डाइभर्सन बगाएपछि यातायात ठप्प भएको छ । निरन्तर वर्षा भइरहेकाले तत्काल सडक सञ्चालन गर्न कठिन रहेको विभागले जनाएको छ ।

कान्ति राजमार्गअन्तर्गत चपली, तकुर्चेलगायत स्थानमा पहिरो खसेपछि सवारी आवागमन बन्द भएको छ । सिद्धिचरण राजमार्गको ओखलढुङ्गा–सल्लेरी खण्डमा सोलुखोलानजिक सडक भासिएपछि भित्तो कटान गरेर अस्थायी रूपमा यातायात सञ्चालन गरिएको छ ।

मध्यपहाडी राजमार्गअन्तर्गत बागलुङको घोडाबाँधे–हटिया खण्डका नरेठाँटी, काफलठुटा, झाँक्रीस्थान र चौराहलगायत स्थानमा पहिरो तथा ढलेका रुख हटाएर सडक एकतर्फी सञ्चालनमा ल्याइएको छ ।

कालीगण्डकी करिडोरअन्तर्गत म्याग्दीको रघुगङ्गा–२ बैसेरी सिरुवारीमा पहिरो खसे पनि निरन्तर वर्षाका कारण हटाउन कठिनाइ भइरहेको छ । जैमिनी–८ बेलबगरमा स्थानीय यातायातका लागि सडक एकतर्फी खुलाइएको छ भने लामो दूरीका सवारीलाई भने सञ्चालन अनुमति दिइएको छैन ।

तमोर करिडोरको मुलघाट–फिदिम सडकखण्डअन्तर्गत छरुवा खोला, नवा खोला र रानीगाउँमा सडक आंशिक रूपमा अवरुद्ध भएको छ । नदीको बहाव बढ्दा सडक बन्द हुने र पानीको सतह घटेपछि सञ्चालन हुने अवस्था रहेको विभागले जनाएको छ ।

राप्ती राजमार्गको कपुरकोट–खारखोला–टुनीकोट खण्डमा पहिरो खसेपछि सडक पूर्णरूपमा बन्द छ। कर्णाली राजमार्गको गगने खोला, राँका तथा बाङ्गेसिमल–दहीखोला खण्डमा पनि पहिरोका कारण यातायात प्रभावित भएको छ । ती स्थानमा पहिरो हटाएर सडक सञ्चालन गर्ने काम भइरहेको छ ।

भालुवाङ–चकचके–लिवाङ सडकका विभिन्न स्थानमा पहिरो खसेपछि आंशिक अवरोध भएको छ । साना सवारीसाधनलाई सावधानीपूर्वक सञ्चालन गर्न दिइएको छ भने पहिरो तथा ढुंगा हटाउने काम भइरहेको छ ।

बेँसीसहर–चामे सडकअन्तर्गत मनाङको नासो गाउँपालिका–खोत्रोमा ढुंगा खसेपछि सडक पूर्णरूपमा बन्द भएको छ । वर्षा भइरहेकाले पहिरो हटाउनसमेत कठिनाइ भइरहेको विभागले जनाएको छ ।

सडक विभागका प्रवक्ता शुभराज न्यौपानेका अनुसार अवरुद्ध सडक खुलाउन आवश्यक उपकरण तथा प्राविधिक टोली प्रभावित क्षेत्रमा परिचालन गरिएको छ । सडकको अवस्था हेरेर अवरोध हटाउने र यातायात सेवा सकेसम्म छिटो सञ्चालन गर्ने प्रयास भइरहेको विभागले जनाएको छ ।