स्वास्थ्य समस्या देखिएपछि राष्ट्रपति पौडेल अस्पताल भर्ना

काठमाडौं । राष्ट्रपति रामचन्द्र पौडेल स्वास्थ्यमा समस्या उत्पन्न भएपछि शनिबार महाराजगञ्जस्थित त्रिवि शिक्षण अस्पतालमा भर्ना भएका छन् ।

शीतल निवासमा जेनजी प्रतिनिधिमण्डलसँगको छलफल भइरहेकै बेला एक्कासी टाउको दुख्ने र वान्ता हुने समस्या देखिएपछि चिकित्सकको सल्लाहमा उनलाई तुरुन्त अस्पताल लगिएको राष्ट्रपतिका प्रेस संयोजक खिला कार्कीले जानकारी दिए ।

स्वास्थ्य अवस्थाका कारण शनिबार तय गरिएको वार्ता स्थगित गरिएको छ । अब जेनजी पक्षसँगको संवाद सोमबार मात्रै जारी रहने कार्कीले बताए ।

यसअघि शनिबार नै वार्ताको तयारी भइरहेको समयमा शीतल निवासबाहिर केही जेनजी युवाहरूले असन्तुष्टि जनाउँदै नाराबाजी गरेका थिए । भेटवार्ताको पात्र र प्रक्रिया सम्बन्धी अस्पष्टताका कारण विरोध प्रदर्शन भएको हो ।

राष्ट्रपति पौडेलले शुक्रबार प्रधानमन्त्री र विभिन्न राजनीतिक दलका प्रतिनिधिसँग फागुन २१ को निर्वाचन तयारीबारे छलफल गर्दै दलहरूलाई समयमै तयारी गर्न सुझाव दिएका थिए ।