इम्बोस्ड नम्बर प्लेटमा जरिवाना नलाग्ने विभागको प्रष्टिकरण

काठमाडौं । यातायात व्यवस्था विभागले तत्कालै सवारी साधनमा इम्बोस्ड नम्बर प्लेट जडान नगरे पनि कुनै किसिमको जरिवाना नलाग्ने जनाएको छ ।

मंगलबार सार्वजनिक विज्ञप्तिमा विभागका महानिर्देशक राजिव पोखरेलले असोज १ गतेदेखि नम्बर प्लेट नजडान गर्ने सवारीलाई तुरुन्तै जरिवाना वा कारबाही गरिने भन्ने हल्ला पूर्ण रूपमा गलत भएको स्पष्ट पारे ।

विभागले सेवाग्राहीलाई आफूलाई सहज हुने समयमा सवारी दर्ता कार्यालयमै गएर स्वतःस्फूर्त ढंगले नम्बर प्लेट जडान गर्न सकिने जनाएको छ ।

सरकारले सबै क्षेत्रमा डिजिटलाइजेसनलाई अगाडि बढाइरहेको सन्दर्भमा यातायात क्षेत्र पनि क्रमशः डिजिटलाइज हुने भन्दै विभागले सवारीधनीलाई सहयोगी भूमिका निर्वाह गर्न आग्रह गरेको छ । यसका लागि विभाग र प्रदेश कार्यालयहरूले आवश्यक पूर्वाधार तथा जनशक्ति व्यवस्थापन गरिरहेको पनि जानकारी दिएको छ ।

इम्बोस्ड नम्बर प्लेटमा प्रयोग भएको अंग्रेजी लिपीसम्बन्धी प्रश्न उठेकामा विभागले ठेक्का सम्झौताअनुसार सर्वोच्च अदालतको संवैधानिक इजलासले समेत त्रुटि नदेखाएको भन्दै यसलाई उचित ठहराएको छ । साथै, राहदानी, नागरिकता, सवारी चालक अनुमतिपत्र र राष्ट्रिय परिचयपत्रमा समेत अंग्रेजी लिपी प्रयोग भइरहेको उदाहरणसमेत दिएको छ ।