जनयुद्धको ऐतिहासिक तथ्य आत्मसात् गर्नुपर्ने प्रचण्डको आह्वान

काठमाडौं । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले जनयुद्धको ऐतिहासिक तथ्य र उचाइलाई आत्मसात् गर्नुपर्ने आह्वान गरेका छन् ।

संविधान दिवसका अवसरमा शुक्रबार पार्टी कार्यालयमा आयोजित कार्यक्रममा सम्बोधन गर्दै प्रचण्डले जेनजी आन्दोलनका कारण यस वर्षको संविधान दिवस विशेष ढंगले मनाइरहेको बताए । उनले नयाँ राजनीतिक परिस्थितिमा संविधान दिवसले मौलिकता पाएको धारणा राखे ।

“हामी अहिले ११औँ संविधान दिवस मनाउँदैछौँ । जेनजी आन्दोलनबाट सिर्जित नयाँ राजनीतिक अवस्थाबीच संविधान दिवस मनाउनु नै यसको मौलिकता हो”, प्रचण्डले भने ।

पूर्वप्रधानमन्त्रीसमेत रहेका प्रचण्डले संविधानसभाबाट संविधान बनाउन पुग्न झन्डै ७० वर्ष लामो संघर्षको यात्रा तय गर्नुपरेको स्मरण गरे । त्यसक्रममा थुप्रै आन्दोलनहरू भएका उल्लेख गर्दै उनले जनयुद्धले दिएको योगदान आत्मसात् गर्नुपर्नेमा जोड दिए ।

उनले संविधान निर्माणलाई चुनौतीपूर्ण र जटिल कार्यका रूपमा चित्रण गर्दै, एकथरी शक्तिहरूले दलित, महिला, मधेसी, कर्णालीदेखि मेची–महाकालीसम्मको पहिचानसहितको संविधान बनाउन चाहनै नचाहेको आरोप लगाए ।

“ठूला दलहरूको अहङ्कारकै कारण अहिलेको अवस्था आएको हो”, उनले भने, “त्यसवेला संविधान घोषणा गर्नकै लागि मैले ठूला दलका नेतालाई प्रधानमन्त्री अफर गर्नुपरेको थियो । त्यो नगरेको भए के हुन्थ्यो भन्ने प्रश्न अहिले पनि मेरो दिमागमा घुमिरहेको छ ।”

प्रचण्डले आफूले चाहेजसरी संविधान बनाउन पाएको भए आज जेनजी पुस्ताले आन्दोलन गर्नुपर्ने अवस्था सिर्जना हुने थिएन दाबी गर्दै, संविधान निर्माण रोक्न ठूलो दबाब र धम्की भोग्नुपरेको पनि बताए ।