प्रचण्डले अवलोकन गरे ध्वस्त कार्यालय, नयाँ भव्य भवन बनाउने घोषणा

काठमाडौं । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ भदौ २३ र २४ गते भएको जेन जी आन्दोलनका क्रममा ध्वस्त पारिएको पार्टीको पेरिसडाँडास्थित केन्द्रीय कार्यालयको अवलोकनमा पुगेका छन् ।

आन्दोलनका क्रममा आगजनी गरेर पूर्णरूपमा ध्वस्त पारिएको उक्त कार्यालय अवलोकनपछि पहिलोपटक सार्वजनिक भएका प्रचण्डले देशभरका कार्यकर्ताको सहयोगमा नयाँ र भव्य केन्द्रीय कार्यालय निर्माण गरिने घोषणा गरे । तर कार्यालय कहाँ निर्माण गर्ने भन्ने विषयमा उनले खुलाएका छैनन् ।

प्रचण्डका अनुसार ध्वस्त कार्यालयबाट पार्टी बैठकका माइन्युट, पुस्तकालय र केही कम्प्युटर जोगाउन सकिएको छ । उनले ती सामग्री सुरक्षित राख्न भूमिका खेलेका कर्मचारी र कार्यकर्तालाई धन्यवाद दिएका छन् ।

जेन जी आन्दोलनकै क्रममा प्रचण्ड बस्दै आएको खुमलटारस्थित निवास समेत जलाइ ध्वस्त पारिएको छ । यद्यपि सो निवास निर्माण व्यवसायी शारदाप्रसाद अधिकारीको भएको बताइएको छ । उता चितवनमा नवनिर्मित अर्को निवास पनि आन्दोलनकै क्रममा खरानी बनाइएको छ ।