कांग्रेस केन्द्रीय समिति बस्दै, देउवा पहिलोपटक सार्वजनिक रूपमा देखिने

काठमाडौं । नेपाली कांग्रेसको केन्द्रीय कार्यसमिति बैठक आज दिउँसो १ बजे पार्टीको केन्द्रीय कार्यालय सानेपामा बस्न लागेको छ । बैठकमा पछिल्लो राजनीतिक अवस्था र पार्टीको आगामी रणनीतिबारे छलफल हुने बताइएको छ ।

बैठकको विशेष पक्ष भनेको पार्टी सभापति शेरबहादुर देउवाको सहभागिता हो । जेन(जी आन्दोलनका क्रममा भदौ २४ गते बूढानीलकण्ठस्थित आफ्नै निवासमा आक्रमणमा परी घाइते भएका देउवा पहिलो पटक सार्वजनिक कार्यक्रममा देखिन लागेका हुन् । घटनापछि उनी कुनैपनि सार्वजनिक कार्यक्रममा सहभागी भएका थिएनन् । यसअघि बसेको पार्टी पदाधिकारी बैठकमा समेत उनी अनुपस्थित थिए ।

पार्टी केन्द्रीय कार्यालयका मुख्यसचिव कृष्णप्रसाद पौडेलका अनुसार, जेन(जी आन्दोलनपछि सिर्जिएको नयाँ राजनीतिक परिस्थिति, कांग्रेसको भूमिका र आगामी कदमबारे आजको बैठकमा छलफल हुनेछ ।

यद्यपि केन्द्रीय समिति बैठकमा पेस गरिने एजेण्डा भने अहिलेसम्म पूर्णरूपमा तय हुन सकेको छैन । कांग्रेसका महामन्त्रीद्वय गगन थापा र विश्वप्रकाश शर्माले आगामी मंसिरभित्रै १५औँ महाधिवेशन गर्नुपर्ने प्रस्ताव राखेका छन् । तर सो प्रस्तावमा शीर्ष तहमा सहमति जुट्न नसकेका कारण एजेण्डा टुङ्गो लागेको छैन ।

एजेण्डालाई अन्तिम रूप दिनका लागि आजै बिहान ११ बजे कार्यसम्पादन समिति बैठक बोलाइएको छ । केन्द्रीय कार्यसमिति बैठकमा पार्टीका पदाधिकारी, केन्द्रीय सदस्य, आमन्त्रित सदस्य तथा सातै प्रदेश सभापतिहरूलाई बोलाइएको छ ।