देशभर आज बदली, मधेश–कोशी लगायतका केही स्थानमा भारी वर्षाको सम्भावना

काठमाडौं । हाल देशभर मनसुन सक्रिय रहेको छ र मनसुनको न्यून चापीय रेखा सरदरभन्दा दक्षिणतिर अवस्थित रहँदा देशभर मौसम बदली हुने मौसम पूर्वानुमान महाशाखाले जनाएको छ ।

आज दिउँसो देशभर सामान्यदेखि पूर्ण बदली रहनेछ । कोशी प्रदेश, मधेश प्रदेश, बागमती प्रदेश र गण्डकी प्रदेशका केही स्थानहरूमा मध्यम वर्षा हुने सम्भावना रहेको छ । साथै, बाँकी पहाडी तथा तराई क्षेत्रका थोरै स्थानहरूमा पनि वर्षाको सम्भावना छ ।

आज रातिको समयमा पनि देशभर साधारणतया बदली रहनेछ । कोशी, मधेश, बागमती र गण्डकी प्रदेशका साथै देशका पहाडी भू(भागका केही स्थानहरूमा मध्यम वर्षा हुने अनुमान गरिएको छ ।

त्यस्तै, मधेश प्रदेश, कोशी, बागमती र गण्डकी प्रदेशका पहाडी र तराई भू(भागका एक–दुई स्थानमा भारी वर्षा पनि हुन सक्ने सम्भावना छ ।

मौसम पूर्वामानुन महाशाखाले अत्यधिक वर्षाका कारण पहिरो, बाढी र डुबानको सम्भावना रहेको भन्दै सतर्कता अपनाउन आग्रह गरेका छ । यात्रुहरू, किसान र नदी किनार आसपासका बासिन्दालाई विशेष ध्यान दिन सुझाव दिइएको छ ।