कांग्रेस सांसद रामहरि खतिवडा संसदीय सुनुवाइ समितिमा

काठमाडौं । नेपाली कांग्रेसले राज्य व्यवस्था तथा सुशासन समितिको सभापतिबाट राजीनामा दिएका सांसद रामहरि खतिवडालाई संसदीय सुनुवाइ समिति (संयुक्त) मा पठाएको छ ।

सुनुवाइ समितिको सभापतिबाट ईश्वरी न्यौपाने राजीनामा दिएर राज्य व्यवस्था समितिको सभापति बनेकी थिइन् । त्यसपछि रिक्त भएको सदस्य पदमा खतिवडालाई पठाइएको हो ।

आज बसेको प्रतिनिधि सभा बैठकमा उपसभामुख इन्दिरा रानामगरले खतिवडालाई सुनुवाइ समितिमा पठाउने प्रस्ताव प्रस्तुत गरेकी थिइन् । सो प्रस्ताव सर्वसम्मतिले स्वीकृत भएको हो ।

संघीय निजामती विधेयकअन्तर्गत ‘कुलिङ पिरियड’ प्रकरणमा छानबिन समितिले नैतिक जिम्मेवारी ठहर गरेपछि खतिवडाले राज्य व्यवस्था तथा सुशासन समितिको सभापतिबाट राजीनामा दिएका थिए ।