प्रधानमन्त्री ओलीको चीन भ्रमण मन्त्रिपरिषद्ले स्वीकृत गर्‍यो

काठमाडौं । प्रधानमन्त्री केपी शर्मा ओलीको आसन्न चीन भ्रमण मन्त्रिपरिषद्ले स्वीकृत गरेको छ। आज बिहान बसेको मन्त्रिपरिषद् बैठकले शनिबारदेखि सुरु हुने भ्रमणमा प्रधानमन्त्री ओलीसहितको नेपाली प्रतिनिधिमण्डललाई अनुमति दिएको हो ।

चीनका राष्ट्रपति सी चिनफिङको निमन्त्रणामा प्रधानमन्त्री ओली नेतृत्वको टोली शाङ्घाई सहयोग संगठन (एससीओ) को शिखर सम्मेलनमा सहभागी हुन चीनतर्फ प्रस्थान गर्न लागेको हो । विश्वकै ठुलो क्षेत्रीय सुरक्षा र आर्थिक संगठनमध्ये एक मानिने एससीओ सम्मेलनलाई नेपाल–चीन सम्बन्ध सुदृढ बनाउन र बहुपक्षीय सहकार्यमा नेपालको सक्रियता देखाउन महत्त्वपूर्ण अवसरको रूपमा हेरिएको छ ।

भ्रमणका क्रममा प्रधानमन्त्री ओलीले चीनका राष्ट्रपति सी चिनफिङ, रुसका राष्ट्रपति भ्लादिमिर पुटिनसहित सहभागी अन्य मुलुकका राष्ट्रप्रमुख तथा सरकार प्रमुखहरूसँग दुई पक्षीय भेटवार्ता गर्ने कार्यक्रम तय भएको छ ।

प्रधानमन्त्री ओली नेतृत्वको टोली भदौ १८ गते स्वदेश फर्कनेछ।