जसपाले समर्थन फिर्ता लिने तयारी, संसदीय दललाई अन्तिम निर्णयको जिम्मा

काठमाडौं । जनता समाजवादी पार्टी (जसपा) नेपालले सरकारलाई दिएको समर्थन फिर्ता लिने संकेत दिएको छ । सोमबार बसेको पार्टीको केन्द्रीय कार्यकारिणी समितिको बैठकले गठबन्धन सरकारप्रति गम्भीर असन्तुष्टि जनाउँदै समर्थनको विषय पुनरावलोकन गर्ने निर्णय गरेको हो ।

पार्टी अध्यक्ष उपेन्द्र यादवका अनुसार, सरकार भ्रष्टाचार नियन्त्रण, सुशासनको प्रत्याभूति, संविधान संशोधनको प्रक्रिया अगाडि बढाउनेजस्ता मुख्य विषयमा पूर्णतः असफल भएको निष्कर्ष पार्टीले निकालेको छ । साथै, आर्थिक सुधारका क्षेत्रमा पनि सरकार चुकेको भन्दै अब समर्थनको औचित्यमा पुनर्विचार गर्नुपर्ने धारणा बनाइएको हो ।

‘केन्द्रीय कार्यकारिणी बैठकले सरकारलाई दिएको समर्थनको विषयमा पुनर्विचार गर्ने निर्णय गरेको छ। यसबारे अन्तिम निर्णय भने संसदीय दलको बैठकले गर्नेछ,’ अध्यक्ष यादवले भने ।

पार्टीको अन्तिम निर्णय अब संसदीय दलको बैठकले गर्नेछ । सम्भवतः केही दिनमै संसदीय दलको बैठक बस्ने र औपचारिक रूपमा समर्थन फिर्ताको घोषणा हुने अनुमान गरिएको छ । यसअघि पनि जसपाले समर्थन दिने वा नदिने विषयमा रणनीतिक मौनता अपनाउँदै आएको थियो ।