‘कुलिङ अफ पिरियड’ विवादः सभापति खतिवडा राजीनामाको तयारीमा

काठमाडौं । ‘कुलिङ अफ पिरियड’ सम्बन्धी गडबडीबारेको विशेष समितिको प्रतिवेदनले जिम्मेवार ठहर गरेपछि प्रतिनिधिसभा राज्य व्यवस्था तथा सुशासन समितिका सभापति रामहरि खतिवडा राजीनामा दिने तयारीमा छन् ।

प्रतिनिधिसभाको मंगलबारको बैठकमा बोल्न समय मागेका खतिवडाले बैठक सुरू हुनु अघि सभामुख देवराज घिमिरे र नेपाली कांग्रेसका प्रमुख सचेतक श्याम घिमिरेसँग भेट गरेका थिए ।

विशेष छानबिन समितिको प्रतिवेदनले खतिवडासँगै समितिका सचिव सुरजकुमार दुरालाई पनि प्रत्यक्ष जिम्मेवारका रूपमा किटान गरेको छ । प्रतिवेदनमा खतिवडाले परिमार्जित मस्यौदा प्रतिवेदन सदस्यहरूसँग छलफल नगरी, निश्चित व्यक्तिहरूबीच अनौपचारिक बैठक गरी २०८२ जेठ १३ गते प्रतिवेदन पठाएको देखिएको उल्लेख छ । यसलाई सभापतिको समन्वयकारी भूमिकामा कमी र गम्भीर त्रुटिका रूपमा चित्रण गरिएको छ ।

त्यस्तै सचिव दुराले पनि प्रारम्भदेखि प्रतिवेदन लेखनसम्मको भूमिकामा रहेर आफ्नो परिभाषित जिम्मेवारी पूरा नगरेको ठहर गरिएको छ ।

प्रतिवेदनले मुख्यसचिवलगायतका केही कर्मचारीमाथि समेत ‘कुलिङ अफ पिरियड’ हटाउन लबिङ गरेको र समितिको निर्णयको सार्वजनिक रूपमा विपक्षमा देखिनु पदाधिकारीको आचरणविपरीत भएको टिप्पणी गरेको छ ।