२० लाख धरौटी बुझाएर पूर्वसभामुख महरा रिहा

काठमान्डु । सुन तस्करीको आरोपमा पुर्पक्षका लागि थुनामा रहेका पूर्वसभामुख कृष्णबहादुर महरा २० लाख रुपैयाँ धरौटी बुझाएर रिहा भएका छन् ।

उच्च अदालत पाटनले तोकेको धरौटीबापतको रकम बुझाउन उनीलाई बिहीबार काठमान्डु जिल्ला अदालत उपस्थित गराइएको थियो । जिल्ला अदालतका प्रवक्ता दीपक कुमार श्रेष्ठका अनुसार महराले आवश्यक रकम बुझाएपछि रिहा प्रक्रिया पूरा भएको हो ।

उच्च अदालत पाटनका न्यायाधीश अर्जुनप्रसाद कोइराला र तेजेन्द्रप्रसाद शर्मा सापकोटाको इजलासले महरालाई २० लाख धरौटीमा छाड्ने आदेश दिएको थियो । आदेशमा मुल जाहेरीमा महराको नाम उल्लेख नभएको, पहिलो पुरक अभियोगमा समेत स्पष्ट संकेत नपाइने र अन्य अभियुक्तहरूले समेत उनको संलग्नता पोल गरेको नदेखिएको उल्लेख छ ।

अदालतले मुल अभियोग तथा पहिलो पुरक अभियोगमा पेश गरिएका प्रमाणहरूको विश्लेषण गर्दै महरालाई थुनामै राखिरहनुपर्ने कुनै बाध्यकारी कारण नदेखिएको निष्कर्ष निकालेको हो ।

यसअघि काठमान्डु जिल्ला अदालतले २९ असोजमा महरालाई थुनामा राख्ने आदेश दिएको थियो, जुन निर्णयलाई उल्टाउँदै उच्च अदालतले धरौटीमा रिहा गर्ने आदेश दिएको हो ।