खिजीदेम्बाका उत्कृष्ट छात्रालाई पूर्ण छात्रवृत्ति, कक्षा ११–१२ निःशुल्क पढ्न पाउने

काठमाडौं । ओखलढुंगास्थित खिजीदेम्बा गाउँपालिकाले यस वर्ष एसईईमा उत्कृष्ट नतिजा ल्याउने १० जना छात्रालाई पूर्ण छात्रवृत्तिमा कक्षा ११ र १२ अध्ययन गराउने भएको छ । गाउँपालिकाले छात्रा शिक्षालाई प्रोत्साहन गर्ने उद्देश्यसहित यस्तो कार्यक्रम अघि बढाएको जनाएको छ ।

गाउँपालिकाका अध्यक्ष गम्बु शेर्पाका अनुसार छात्रवृत्ति कार्यक्रमका लागि सोवर्स एक्सन नेपाल र गाउँपालिकाबीच दुई वर्षका लागि सहमति हस्ताक्षर गरिएको छ । सम्झौताअनुसार छनोटमा पर्ने छात्राहरूले आफूले रोजेको विषयमा कक्षा ११ र १२ अध्ययन गर्न पाउनेछन् ।

कार्यक्रम अन्तर्गत एसईईमा उत्कृष्ट अंक ल्याएर उत्तीर्ण भएका १० जना छात्रालाई अध्ययन खर्चको पूर्ण व्यवस्था गरिने जनाइएको छ । छात्रवृत्तिमा ट्युसन शुल्कसहित आवश्यक शैक्षिक सहयोग उपलब्ध गराइने गाउँपालिकाले जनाएको छ ।

अध्यक्ष शेर्पाले गाउँपालिकाभित्रका छात्राहरूलाई उच्च शिक्षातर्फ प्रेरित गर्ने तथा आर्थिक अभावका कारण पढाइ रोक्नुपर्ने अवस्था अन्त्य गर्ने उद्देश्यले कार्यक्रम ल्याइएको बताए । उनले चाँडै औपचारिक सूचना सार्वजनिक गरिने जानकारी पनि दिएका छन् ।

उनले “खिजीदेम्बाका चेलीहरूको उज्ज्वल भविष्य निर्माणका लागि गाउँपालिकाले विशेष पहल थालेको हो,” भन्दै योग्य विद्यार्थीलाई अवसरको सदुपयोग गर्न आग्रह गरे ।

स्थानीय तहले छात्रा शिक्षामा केन्द्रित भएर ल्याएको यो कार्यक्रमलाई अभिभावक र शिक्षा क्षेत्रले सकारात्मक रूपमा लिएको बताइएको छ ।