रामेछापमा जीप दुर्घटनाः एकको मृत्यु, एक घाइते

रामेछाप । रामेछापबाट खुर्कोट हुँदै हेटौंडातर्फ जाँदै गरेको जीप दुर्घटनामा परी एक महिलाको मृत्यु भएको छ भने उनका श्रीमान् घाइते भएका छन् ।

ज्यान गुमाउनेमा मन्थली नगरपालिका–११ की ४१ वर्षीया राधा कार्की चौहान रहेकी छन् । घटनास्थलमै उनको मृत्यु भएको जिल्ला प्रहरी कार्यालय रामेछापले जनाएको छ ।

दुर्घटनामा राधाका श्रीमान् ४६ वर्षीय उत्तम चौहान घाइते भएका छन् । उनलाई सामुदायिक अस्पताल रामेछापमा प्रारम्भिक उपचारपछि थप उपचारका लागि काठमाडौं पठाइएको हो ।

प्रहरीका अनुसार चौहान दम्पती आफ्नो छोरालाई भेट्न हेटौंडा जाँदै थिए । बिएससी ८४६३ नम्बरको जीप आइतबार बिहान मन्थली–६ कुनौरीमा सडकमा खसेको पहिरोका कारण सडकबाट तल खसेको प्रहरीले जनाएको छ ।