वृद्ध दम्पतीलाई बन्धक बनाएर डकैती गरेको आरोपमा पाँच पक्राउ

काठमाडौं । रामेछापमा वृद्ध दम्पतीलाई घरमै बन्धक बनाएर गरगहना तथा नगद लुटेको आरोपमा प्रहरीले पाँच जनालाई पक्राउ गरेको छ ।

पक्राउ पर्नेमा सिन्धुलीको घ्याङलेक गाउँपालिका–२ का २५ वर्षीय सुमन जर्घा मगर, रामेछापको खाँडादेवी गाउँपालिका–२ का ३२ वर्षीय दीर्घराज मोक्तान र सोही ठाउँका ३३ वर्षीय पशुपति श्रेष्ठ छन् । यस्तै, झापाको दमक नगरपालिका–७ का ४४ वर्षीय पिताम्बर तहतराज र धनकुटाको बेलाहारा गाउँपालिका–५ का ३८ वर्षीय दीपक भनिने गुणराज विश्वकर्मालाई पनि प्रहरीले पक्राउ गरेको छ ।

जिल्ला प्रहरी कार्यालय रामेछापका अनुसार उनीहरूले गत १८ भदौको राति खाँडादेवी गाउँपालिका–२ मझुवा नेवारटोलमा ८५ वर्षीय बखतमान लामा र उनकी ८६ वर्षीया श्रीमती कान्छी माया तामाङलाई घरमै बन्धक बनाएर लुटपाट गरेका थिए ।

प्रहरीका अनुसार आरोपितहरूले वृद्ध दम्पतीको मुखमा प्लास्टिकको टेप लगाउनुका साथै आँखामा पट्टी बाँधेर ज्यान मार्ने धम्की दिएका थिए । त्यसपछि उनीहरूको घरबाट नगद तथा गरगहना लगायतका सामग्री लुटेर लगेको रामेछापका प्रहरी निरीक्षक कमल राउतले जानकारी दिए ।

पक्राउ परेका सुमन काठमाडौंस्थित एक निजी विद्यालयमा चालकका रूपमा कार्यरत रहेको खुलेको छ । उनको साथबाट २५ हजार रुपैयाँ नगद, मोबाइल फोन तथा बा ७३ प ८७१२ नम्बरको मोटरसाइकल बरामद भएको प्रहरीले जनाएको छ ।

त्यस्तै, बसका सहचालक रहेका दीर्घराजको साथबाट ५२ हजार २ सय रुपैयाँ नगद तथा डकैतीका क्रममा लगाएको भनिएको ज्याकेट र हाफ कट्टु बरामद गरिएको छ ।

पशुपति मोटरसाइकल इनड्राइभ चालक रहेको खुलेको छ । उनीबाट मोटरसाइकल र ६ हजार ४६० रुपैयाँ नगद बरामद भएको छ । साथै, उनको लक्ष्मी सनराइज बैंक खातामा १ लाख ३१ हजार रुपैयाँ रहेको प्रहरीले जनाएको छ । उनीबाट पुराना सिक्का, सुनजस्तो देखिने औँठी र बुद्धचित्तका २२ दाना पनि बरामद भएको छ ।

सुनचाँदी व्यवसायमा संलग्न पिताम्बरलाई पनि प्रहरीले पक्राउ गरेको छ । अर्का आरोपित गुणराजको साथबाट सुनका दुई थान औँठी बरामद भएको प्रहरीले जनाएको छ ।

प्रहरी अनुसन्धानका क्रममा पक्राउ परेकामध्ये केही व्यक्तिको विगतमा पनि विभिन्न आपराधिक घटनामा संलग्नता रहेको खुलेको छ । पशुपति यसअघि रामेछापकै एक महादेव मन्दिरको दानपेटिका फुटाएर चोरी गरेको घटनामा संलग्न रहेको पाइएको प्रहरी निरीक्षक राउतले बताए ।

उनका अनुसार पशुपति १ असार २०८३ मा सुन्दरी श्रेष्ठको करिब ३० किलोको खसी तथा ७ भदौमा रामबहादुर श्रेष्ठको १५ किलोको बोका चोरी भएको घटनामा समेत संलग्न देखिएका छन् । काठमाडौंमा सिक्री लुटेको घटनामा पनि उनको समूहविरुद्ध प्रहरी वृत्त कालिमाटीमा मुद्दा चलेको पाइएको छ ।

यस्तै, दीर्घराजविरुद्ध १४ पुस २०७८ मा रामेछापमै प्रहरीमाथि अभद्र व्यवहार गरेको कसुरमा मुद्दा चलेको प्रहरीले जनाएको छ । गुणराजविरुद्ध भने प्रहरी वृत्त बौद्धमा जुवा कसुरसम्बन्धी मुद्दा चलेको भेटिएको छ ।

प्रहरीका अनुसार यही समूह १८ भदौ २०८३ को बिहान सुनापति गाउँपालिका–२ दिमीपोखरीस्थित ७५ वर्षीय इमान सिं तामाङको घरबाट ७८ हजार रुपैयाँ चोरी भएको घटनामा समेत संलग्न रहेको खुलेको छ ।

पक्राउ परेकाहरूबाट बरामद सामग्री तथा उनीहरूको विगतको गतिविधिबारे थप अनुसन्धान भइरहेको प्रहरीले जनाएको छ ।