झापामा सिँचाइका क्रममा करेन्ट लाग्दा महिलाको ज्यान गयो

झापा । झापाको गौरादह नगरपालिका–४ जोरघरेमा खेतमा सिँचाइ गरिरहेकी एक महिलाको करेन्ट लागेर मृत्यु भएको छ ।

जिल्ला प्रहरी कार्यालय झापाका प्रवक्ता डिएसपी खगेन्द्रबहादुर खड्काका अनुसार ५४ वर्षीया चन्द्रमाया नेम्वाङको सोमबार राति मोटरको प्रयोग गरेर सिँचाइ गर्ने क्रममा करेन्ट लाग्दा घटनास्थलमै ज्यान गएको हो ।

प्रहरीका अनुसार चन्द्रमायालाई विद्युत प्रवाह भएको मोटरमा करेन्ट लागेर लडिरहेको अवस्थामा उनका छोरा २५ वर्षीय सुशील नेम्वाङले फेला पारेका थिए । उनी बेहोस अवस्थामा रहेको बुझिएपछि घरमै ल्याइएका थिए, तर उनी मृत भेटिइन् ।

घटनाको थप विवरण संकलन गर्न इलाका प्रहरी कार्यालय दमकले अनुसन्धान अघि बढाएको छ । प्रारम्भिक अनुमानमा मोटर वा बिजुलीको लाइनमा प्राविधिक गडबडीका कारण करेन्ट लागेको हुनसक्ने प्रहरीको भनाइ छ ।

झापामै केही समयअघि बुद्धशान्ति गाउँपालिकामा पनि खेतमा सिँचाइ गर्ने क्रममा करेन्ट लागेर एक पुरुषको ज्यान गएको घटना स्मरणीय छ । लगातार यस्ता घटना दोहोरिन थालेपछि स्थानीय तहले सिँचाइमा प्रयोग हुने विद्युतीय उपकरणहरूको सुरक्षा मापदण्डप्रति ध्यान दिनुपर्ने आवश्यकता देखिएको छ ।