संघीय लोकतान्त्रिक मोर्चाको जनजागरण अभियान आजदेखि सुरु

काठमाडौं । संघीय लोकतान्त्रिक मोर्चाले ‘वर्तमान राजनीतिक अवस्थाबारे जनजागरण अभियान’ आज (आइतबार) बाट सुरु गर्ने भएको छ । पहिलो कार्यक्रम काठमाडौंको कालिकास्थानमा आयोजना हुने जनता समाजवादी पार्टी (जसपा) नेपालका प्रचार विभाग प्रमुख पूर्ण बस्नेतले जानकारी दिएका छन् ।

मधेस केन्द्रित सात दलको गठबन्धन रहेको मोर्चाले काठमाडौंसहित भैरहवा, नेपालगञ्ज, कैलाली, विराटनगर, राजविराज, जनकपुर र वीरगन्जमा जनजागरण कार्यक्रम सञ्चालन गर्ने तयारी गरेको छ ।

कार्यक्रमहरूमा मोर्चाका शीर्ष नेताहरूले संघीय लोकतान्त्रिक मोर्चाको गठन किन आवश्यक भयो भन्नेबारे जनतालाई स्पष्ट जानकारी दिनेछन् ।

प्रचार प्रमुख बस्नेतका अनुसार कार्यक्रमलाई व्यवस्थित र प्रभावकारी बनाउन मोर्चाका सम्पूर्ण घटक दलहरू तयारीमा जुटेका छन् । जसपा नेपालले आठवटै स्थानमा सहभागी हुने आफ्ना नेताहरूको नाम पनि टुङ्गो लगाइसकेको उनले बताए ।