वर्षाले महोत्तरीका किसानलाई दिएको सासः रोपाइँमा आशा पलायो

महोत्तरी । लामो खडेरीले पीडित बनेका महोत्तरीका किसानहरू हालैको वर्षापछि राहतको सास फेर्न थालेका छन् । सोमबारदेखि लगातार परेको पानीले उनीहरूमा रोपाइँ सुरु गर्ने र बाली बचाउने आशा पलाएको छ ।

जिल्लाका अधिकांश स्थानमा गएराति प्रशस्त पानी परेपछि माटोमा चिस्यान भरिएको छ । यसअघि बिहीबार र सोमबार पनि पानी परेको थियो । भङ्गाहा–३ का किसान विजय यादवका अनुसार पछिल्ला वर्षाले उनीहरूले इनार, बोरिङ र स्यालो ट्युबवेलमार्फत पम्पसेट लगाएर रोपेको धानमा नयाँ जीवन आएको छ । “धान उठ्ने सम्भावना बलियो भएको छ,” उनले भने ।

तीन दिनको झरीले नयाँ रोपाइँ तीव्र नभए पनि पहिले रोपिएको धानलाई चाहिएको चिस्यान मिलेको किसानहरू बताउँछन् । बर्दिबास–७ प्रेमनगरका किसान रामउद्गार महतो भन्छन्, “पहिले घामले पहेँलिएको रोपो पानी परेपछि फेरिएको छ ।”

भङ्गाहा–४ रामनगरका ७५ वर्षीय इस्लाम राइनले भने, “खडेरीले सुक्दै गएको उखुमा अहिले पानीको जादु लागेको जस्तो छ, बोटहरू फेरिँदै छन् ।” उनका अनुसार धान मात्र नभएर उखु, मकै, कोदो र तरकारी बालीमा समेत चिस्यान पुगेको छ ।

तर किसानहरूका अनुसार धानको रोपो राम्रोसँग जाग्न अझै पनि गह्रामा पर्याप्त पानी भरिन आवश्यक छ । यसपालिको खडेरीले धान रोपाइँको समय नै पछि सारेको छ । कृषि ज्ञान केन्द्र महोत्तरीका अनुसार जिल्लामा ४२ हजार ५०० हेक्टर धानयोग्य जमिन भए पनि साउनको तेस्रो सातासम्म जम्मा ३५ प्रतिशत क्षेत्रफलमा मात्र रोपाइँ सकिएको छ ।

यद्यपि, केन्द्रका वरिष्ठ कृषि विकास अधिकृत देवानन्द यादवले पछिल्ला वर्षाले पहिले रोपिएको धानका लागि ठूलो राहत भएको बताएका छन् । उनका अनुसार अझै पानी परे रोपाइँको गति पनि बढ्ने अपेक्षा गर्न सकिन्छ ।