सामाजिक सुरक्षा भत्ता नविकरणका लागि खिजीदेम्बा–३ का लाभग्राहीलाई वडा कार्यालयमा उपस्थित हुन आग्रह

खिजीफलाटे । ओखलढुंगास्थित खिजीदेम्बा गाउँपालिका–३ मा विभिन्न प्रकारका सामाजिक सुरक्षा भत्ता प्राप्त गर्दै आएका लाभग्राहीहरूलाई भत्ता नविकरणको प्रक्रिया सुरु भएको छ । स्थानीय सरकारले जारी गरेको सूचनाअनुसार चालु आर्थिक वर्ष २०८२/०८३ का लागि सामाजिक सुरक्षा नियमावली, २०७६ को नियम ९ तथा भत्ता वितरण कार्यविधि, २०७७ को नियम ४ बमोजिम नविकरण आवश्यक भएको हो ।

यस सन्दर्भमा लाभग्राहीहरूले मिति २०८२ साउन ४ गतेदेखि भदौ दोस्रो हप्ताभित्र आफैँ सम्बन्धित वडा कार्यालयमा आवश्यक कागजातसहित उपस्थित भई नविकरण गराउनुपर्ने वडा कार्यालयले स्पष्ट पारेको छ । समयमै नविकरण नगरेमा भत्ता रोकिन सक्ने भएकाले निर्धारित समयसीमाभित्र उपस्थित हुन आग्रह गरिएको छ ।

नविकरणका लागि आवश्यक पर्ने कागजातहरूः
— नेपाली नागरिकताको प्रतिलिपि
— राष्ट्रिय परिचयपत्र वा राष्ट्रिय परिचयपत्र आवेदनको रुजु फाराम
— बालबालिकाको हकमा जन्मदर्ता प्रमाणपत्र र बाबुरआमाको नागरिकता प्रतिलिपि
— पूर्ण तथा अति अशक्त अपाङ्गताको हकमा अपाङ्गता परिचयपत्रको प्रतिलिपि
— एकल महिलाको हकमा श्रीमान्को मृत्युदर्ता प्रमाणपत्र, नागरिकता, र अर्को विवाह नगरेको प्रमाणित सिफारिस

वडाका जनप्रतिनिधिहरूले यस प्रक्रियालाई सहज र प्रभावकारी बनाउन सहयोग गर्ने प्रतिबद्धता जनाएका छन् । वडा कार्यालयले सबै लाभग्राहीहरूलाई तोकिएको समयमै उपस्थित भई आवश्यक प्रक्रिया पूरा गर्न पुनः आग्रह गरेको छ ।