फागुन २१ को निर्वाचनमा पहिलो दल बन्ने कांग्रेसको दाबी, ५,८५३ नेता–कार्यकर्ता कांग्रेस प्रवेश

काठमाडौं । नेपाली कांग्रेसले फागुन २१ गते हुने निर्वाचनमा पहिलो दल बन्ने दाबी गरेको छ । पार्टी केन्द्रीय कार्यालय सानेपामा आयोजित पत्रकार सम्मेलनमा प्रवक्ता देवराज चालिसेले पार्टीपंक्ति उत्साहित रहेको र जनताको अभूतपूर्व समर्थन प्राप्त भएको बताएका हुन् ।

चालिसेले मतको महत्वबारे उल्लेख गर्दै एक मतले समृद्ध, न्यायपूर्ण र समावेशी नेपाल निर्माणको आधार तय गर्ने धारणा राखे । उनले भ्रष्टाचारमुक्त सुशासन, राष्ट्रिय एकता, स्वाधीनता र लोकतन्त्रको रक्षा कांग्रेसको प्रमुख प्रतिबद्धता भएको बताए ।

व्यापक प्रचार अभियान
पार्टीले कार्यकर्ता भेला, प्रचार तथा परिचालन समिति गठन, प्रत्यक्ष नागरिक संवाद, घरदैलो अभियान, डिजिटल प्रचार, कोणसभा र आमसभामार्फत चुनावी अभियान तीव्र बनाएको जनाएको छ । सभापतिले स्वयं प्रतिज्ञापत्रका विषयमा नागरिकसँग प्रत्यक्ष संवाद गर्दै उठेका जिज्ञासाको प्रस्ट पारिरहेको पनि उनले जानकारी दिए । कांग्रेसको प्रतिबद्धताले नागरिक तहमा विश्वास र समर्थन बढेको उनको दाबी छ ।

विभिन्न दलबाट कांग्रेसमा प्रवेश
पत्रकार सम्मेलनमा पार्टीमा विभिन्न दलका नेता–कार्यकर्ता प्रवेश गरेको जानकारी दिइयो । पार्टी नेतृत्व परिवर्तनपछि नेपाली कांग्रेस बीपीका केन्द्रीयदेखि तल्लो तहसम्मका संरचना कांग्रेसमा समाहित भएको बताइएको छ ।

त्यसैगरी लौरो अभियानका अभियन्ता, नेकपा एमालेका पूर्वमन्त्री तथा संविधानसभा सदस्य, जिल्ला कमिटीका पदाधिकारीहरू र जनवर्गीय संगठनका सदस्यहरू पनि कांग्रेसमा आबद्ध भएका छन् ।

राष्ट्रिय स्वतन्त्र पार्टी (रास्वपा) का दर्जनौँ केन्द्रीय नेता, प्रदेश तहका नेतृत्वकर्ता र विभिन्न समितिमा आबद्ध सदस्यहरू कांग्रेसमा प्रवेश गरेको दाबी गरिएको छ । साथै नेकपा (एकीकृत समाजवादी), जनता समाजवादी पार्टी र बहुजन पार्टीका नेता–कार्यकर्तासमेत कांग्रेसमा समाहित भएको जानकारी दिइयो ।

पार्टीका अनुसार अन्य दल र स्वतन्त्र समूहबाट गरी ५ हजार ८५३ नेता–कार्यकर्ता कांग्रेसमा प्रवेश गरेका छन् । ‘घर फर्क अभियान’ अन्तर्गत अन्य पार्टीमा गएका नेता–कार्यकर्तासमेत पुनः सक्रिय भएको दाबी गरिएको छ ।

निर्वाचन निष्पक्ष बनाउन आग्रह
कांग्रेसले निर्वाचन आचारसंहिता कार्यान्वयनका विषयमा सरकार र निर्वाचन आयोगको ध्यानाकर्षण गराएको छ । शक्तिको दुरुपयोग नहोस् र निर्वाचन निष्पक्ष तथा शान्तिपूर्ण रूपमा सम्पन्न होस् भन्ने अपेक्षा पार्टीले व्यक्त गरेको छ । निर्वाचनलाई प्रभावित पार्ने प्रयास हुन सक्ने भन्दै पार्टीले आफ्ना कार्यकर्तालाई सतर्क रहन आग्रह गरेको छ ।

उपसभापति शर्माको सात बुँदे अपिल
कार्यक्रममा उपसभापति विश्वप्रकाश शर्माले प्रत्यक्ष र समानुपातिक दुवैतर्फ कांग्रेस ठूलो दल बन्ने दाबी गरे । आवश्यकताअनुसार सुरक्षा निकाय परिचालन गर्ने राज्यको नीति रहेको भन्दै अनावश्यक आशंका नगर्न आग्रह गरे ।

उनले सात बुँदे अपिल सार्वजनिक गर्दै सबै दललाई स्वस्थ र भयरहित चुनावमा सहयोग गर्न आग्रह गरे । सरकार र निर्वाचन आयोगलाई निष्पक्षता कायम गर्न, मतदातालाई विवेकपूर्ण निर्णय गर्न, सञ्चारमाध्यमलाई भ्रम नफैलाउन र सामाजिक सञ्जाल प्रयोगकर्तालाई संयमित हुन अपिल गरे ।

पार्टीका नेता–कार्यकर्तालाई ‘मै उम्मेदवार हुँ’ भन्ने भावनासहित सक्रिय हुन आग्रह गर्दै निर्वाचनपछि राष्ट्रिय विषयमा साझा दृष्टिकोण बनाउन सबै दलसँग संवाद गर्न पनि उनले प्रस्ताव गरे ।