चिकित्सकहरूको आन्दोलनले देशभरका अस्पतालमा आकस्मिकबाहेक सेवा ठप्प

काठमाडौं । नेपाल चिकित्सक संघको आव्हानमा सोमबार देशभरका अस्पतालहरूमा आकस्मिकबाहेकका सम्पूर्ण सेवा बन्द गरिएका छन् । उपचारमा त्रुटि देखाउँदै उपभोक्ता अदालतले अस्पताल र चिकित्सकहरूलाई क्षतिपूर्ति तिराउन थालेपछि चिकित्सकहरू आन्दोलित भएका हुन् ।

ओम अस्पताल, हिमाल अस्पताल र ग्राण्डी सिटी अस्पताल तथा त्यहाँ कार्यरत चिकित्सकहरूलाई उपभोक्ता अदालतले क्रमशः ५० लाख ७० हजार, १ करोड ४५ लाख र ५७ लाख रुपैयाँ क्षतिपूर्ति बिरामीका परिवारलाई तिर्नुपर्ने फैसला गरेपछि चिकित्सकहरू आक्रोशित बनेका छन् । यसै कारण आज देशभरका चिकित्सकहरूले आकस्मिक सेवा बाहेकका सम्पूर्ण सेवा बहिष्कार गरेका हुन् ।

नेपाल चिकित्सक संघका महासचिव डा. सञ्जीव तिवारीविरुद्ध पाटन उच्च अदालतले अदालतको अवहेलना मुद्दामा सात दिनभित्र उपस्थित हुन निर्देशन दिएपछि आन्दोलन चर्किएको हो । आन्दोलनमा देशका नौवटा प्रमुख स्वास्थ्य संस्थाहरूले ऐक्यवद्धता जनाएका छन् ।

सेवा बहिष्कारका कारण सर्वसाधारण बिरामीहरू उपचार नपाएर निकै समस्या भोगिरहेका छन् ।