निर्वाचनसम्बन्धी उत्कृष्ट टिकटक भिडिओलाई आयोगको पुरस्कार, पहिलोलाई ५० हजार

काठमाडौं । निर्वाचन आयोगले आगामी फागुन २१ गते हुने निर्वाचनलाई लक्षित गर्दै निर्वाचन प्रचार–प्रसार र मतदाता शिक्षासम्बन्धी उत्कृष्ट टिकटक भिडिओ निर्माण गर्ने ‘कन्टेन्ट क्रियटर’लाई नगद पुरस्कार प्रदान गर्ने भएको छ ।

आयोगले मंगलबार सूचना जारी गर्दै निर्वाचन आचारसंहिता, निर्वाचन प्रचार–प्रसार तथा मतदाता शिक्षासँग सम्बन्धित विषयमा आधारित भिडिओ बनाउन आह्वान गरेको हो । आयोगका अनुसार प्रतिस्पर्धाका लागि तयार गरिने भिडिओको अवधि एक मिनेटभित्रको हुनुपर्नेछ ।

निर्माण गरिएका भिडिओ टिकटक, फेसबुक र यूट्युबमा सार्वजनिक गरी २०८२ फागुन ३ गतेदेखि १७ गतेभित्र आयोगको इमेल ठेगानामा पठाउनुपर्ने सूचनामा उल्लेख छ ।

आयोगले प्राप्त भिडिओमध्ये सबैभन्दा बढी दर्शक (भ्यूअर्स) पाएका उत्कृष्ट तीनवटा भिडिओलाई क्रमशः ५० हजार, ३० हजार र २० हजार रुपैयाँ नगदसहित प्रमाण–पत्र प्रदान गरिने जनाएको छ ।

यस प्रतियोगितामा सहभागी हुन इच्छुक भिडिओ निर्माताले आयोगले तोकेका सातवटा शर्त अनिवार्य रूपमा पालना गर्नुपर्ने आयोगले जनाएको छ ।