उद्घाटन खेलमा मेक्सिको विजयी, तीन खेलाडीले पाए रातो कार्ड

काठमाडौं । फिफा विश्वकप फुटबल–२०२६ को उद्घाटन खेलमा घरेलु टोली मेक्सिकोले दक्षिण अफ्रिका माथि २–० को जित निकाल्दै प्रतियोगितामा सुखद् सुरुआत गरेको छ ।

मेक्सिको सिटीमा गएराति सम्पन्न खेलमा मेक्सिकोका जुलियन क्विनोनेस र राउल जिमेनेजले एक–एक गोल गर्दै टोलीलाई महत्वपूर्ण तीन अंक दिलाए ।

खेलको नवौं मिनेटमा इरिक लिराको पासमा जुलियन क्विनोनेसले गोल गर्दै मेक्सिकोलाई अग्रता दिलाएका थिए । पहिलो हाफमा मेक्सिको यही गोलले अगाडि रह्यो ।

दोस्रो हाफको ४९औँ मिनेटमा दक्षिण अफ्रिकाका सेफेलो सिथोलले रातो कार्ड पाएपछि टोली १० खेलाडीमा सीमित बन्यो । संख्यात्मक रूपमा कमजोर बनेको दक्षिण अफ्रिकामाथि दबाब बढाउँदै मेक्सिकोले ६७औँ मिनेटमा अर्को गोल थप्यो । राउल जिमेनेजले गोल गर्दै घरेलु टोलीको अग्रता दोब्बर बनाए ।

खेलको ८४औँ मिनेटमा दक्षिण अफ्रिकाका थेम्बा ज्वानेले पनि रातो कार्ड पाएपछि टोली ९ खेलाडीमा झर्यो । यद्यपि अतिरिक्त समयमा मेक्सिकोका सेजर मोन्टेसले समेत रातो कार्ड पाएर मैदान छाडे ।

यससँगै विश्वकप २०२६ को उद्घाटन खेलमै तीन खेलाडीले रातो कार्ड पाउने दुर्लभ घटना देखिएको छ । दुई खेलाडी दक्षिण अफ्रिकाबाट र एक खेलाडी मेक्सिकोबाट मैदान बाहिरिएका थिए ।

जितसँगै समूह ‘ए’मा रहेको मेक्सिकोले महत्वपूर्ण तीन अंक जोडेको छ ।