सांसद थानीको प्रश्नः ‘सभापति खतिवडाको कोर टिममा को–को थिए ?’

काठमाडौं । नेपाली कांग्रेसका सांसद हृदयराम थानीले संघीय निजामती सेवा विधेयकमा भएको संशयास्पद चलखेलबारे समिति सभापति रामहरि खतिवडा र सचिव सुरजकुमार दुरालाई घेरामा ल्याएका छन् । उनले समितिको बुधबारको बैठकमा दुवैलाई सीधै प्रश्न गर्दै कसको प्रभावमा विवादास्पद बुँदा थपियो भनेर जवाफ मागे ।

थानीले सचिव दुरालाई लक्षित गर्दै सोधे, ‘तपाईंले विधेयक नपढी सही गर्नुभयो भन्ने लाग्दैन । तर, के तपाईंले कुनै प्रभावमा परेर धारा ५(क) थप्नुभयो ?,’ उनले थपे, ‘तपाईं त अनुभवी सचिव हो, नयाँ व्यक्ति होइन । अनि सभापति खतिवडा पनि सामान्य व्यक्ति होइनन् । त्यसैले ‘थाहा थिएन’ भनेर उम्किन मिल्दैन ।’

थानीले सभापति खतिवडामाथि पनि गम्भीर प्रश्न उठाए । ‘सभापतिज्यू, तपाईंको कोर टिममा को–को थिए?’ भन्दै उनले कांग्रेस र एमालेका तर्फबाट समितिमा को–को सहभागी थिए भनेर स्पष्ट गर्न माग गरे । ‘यसरी त संसदीय समितिको अस्तित्वमै प्रश्न उठ्छ । तपाईंको एकल निर्णयले हामी असन्तुष्ट भएका छौँ,’ थानीले भने ।

निजामती सेवा विधेयकमा सुरुमा राखिएको दुई वर्षे ‘कुलिङ पिरियड’ पछि विधेयक पारित गर्ने चरणमा फरक व्यवस्था राखिएको आरोप लागेको छ । यसै कारण सभापति खतिवडा र सचिव दुरा दुवैको भूमिकामाथि प्रश्न उठेका छन् ।