बागमतीमा नयाँ मुख्यमन्त्री चयन प्रक्रिया अघि बढ्यो

हेटौँडा । बागमती प्रदेशमा नयाँ मुख्यमन्त्री चयनको प्रक्रिया औपचारिक रूपमा अघि बढेको छ ।

आइतबार मुख्यमन्त्री बहादुरसिंह लामाले पदबाट राजीनामा दिएपछि प्रदेश प्रमुख दीपकप्रसाद देवकोटाले सोमबार संविधानको धारा १६८(२) अनुसार नयाँ सरकार गठनका लागि पहल गर्न आह्वान गरेका हुन् ।

लामाले संविधानको धारा १६९(१)(क) बमोजिम आफ्नो राजीनामा पेश गरेका थिए ।

संविधानको धारा १६८(२) अनुसार प्रदेशसभामा दुई वा सोभन्दा बढी दलको समर्थन जुटाउन सक्ने कुनै एक सांसदले मुख्यमन्त्रीको दाबी पेश गर्न सक्ने प्रावधान छ । सोही आधारमा दाबी पेश गर्न बोलाइएको हो ।

प्रदेश प्रमुखको कार्यालयका प्रवक्ता देवेन्द्र सापकोटाद्वारा जारी विज्ञप्तिमा मंगलबार दिउँसो २ बजेभित्र मुख्यमन्त्री पदका आकांक्षीले आफ्नो दाबी सहित निवेदन पेश गर्न भनिएको छ ।