असार महिनाको उत्कृष्ट प्रहरी बने असई विक्रम भुजेल

काठमाडौं । काठमाडौं उपत्यका अपराध अनुसन्धान कार्यालय, टेकुमा कार्यरत प्रहरी सहायक निरीक्षक (असई) विक्रम भुजेल असार महिनाका लागि ‘बेस्ट पुलिस अफ द मन्थ’ घोषित भएका छन् ।

अपराध अनुसन्धान कार्यालयले उत्कृष्ट कार्यसम्पादनको मूल्यांकन गर्दै भुजेललाई सम्मान तथा पुरस्कृत गरेको जनाएको छ । कार्यालयका अनुसार उनले अनुसन्धानका क्रममा देखाएको व्यावसायिक दक्षता, इमान्दारिता र नतिजामुखी कार्यशैलीका आधारमा यो सम्मान प्राप्त गरेका हुन् ।

भुजेलले सूचना संकलन, अपराधको विश्लेषण तथा जटिल प्रकृतिका घटनाको अनुसन्धानमा प्रभावकारी भूमिका निर्वाह गरेका छन् । विशेषगरी गुण्डागर्दी नियन्त्रण, फरार प्रतिवादीको खोजी तथा पक्राउ, कर्तव्य ज्यान, चोरी, डाँका जस्ता गम्भीर अपराधका घटनाको अनुसन्धानमा उनको योगदान उल्लेखनीय रहेको कार्यालयले जनाएको छ ।

त्यसैगरी कारागारबाट फरार भएका प्रतिवादीलाई पक्राउ गर्न र विभिन्न आपराधिक गतिविधि नियन्त्रणमा उनले खेलेको सक्रिय भूमिकालाई समेत मूल्यांकन गर्दै असार महिनाको उत्कृष्ट प्रहरीको रूपमा छनोट गरिएको अपराध अनुसन्धान कार्यालयले जनाएको छ ।