बंगलादेशमा बीएनपीको स्पष्ट बहुमत, तारिक रहमान प्रधानमन्त्री बन्ने पक्का जस्तै

ढाका । बिहीबार सम्पन्न बंगलादेशको संसदीय निर्वाचनमा बंगलादेश नेसनालिस्ट पार्टी (बीएनपी) ले स्पष्ट बहुमत हासिल गरेको छ । हालसम्म घोषणा गरिएको परिणामअनुसार २९९ सिटमध्ये बीएनपीले १६५ सिट जित्दै सरकार गठनको मार्ग प्रशस्त गरेको हो ।

बीएनपी अध्यक्ष तथा पूर्वप्रधानमन्त्री खालिदा जियाका छोरा तारिक रहमान प्रधानमन्त्री बन्ने लगभग निश्चित भएको छ । दुई निर्वाचन क्षेत्रमा प्रतिस्पर्धा गरेका रहमान दुवै क्षेत्रमा विजयी भएका छन् । बेलायतमा १७ वर्ष निर्वासनमा बसेपछि उनी गत जनवरी २५ मा स्वदेश फर्किएका थिए ।

जमात–ए–इस्लामीको नेतृत्वमा रहेको ११ दलको गठबन्धनले हालसम्म ४५ सिट जितेको छ । जमात प्रमुख सफिकुर रहमानले ढाका–१५ बाट जित हासिल गरेका छन् । अन्य दल तथा स्वतन्त्र उम्मेदवारहरूले तीन सिटमा विजय हात पारेका छन् ।

समाचार तयार पार्दासम्म २०६ सिटको मात्र आधिकारिक परिणाम सार्वजनिक भएको छ भने बाँकी सिटको मतगणना जारी छ ।

सन् १९९१ देखि २०२४ सम्म आलोपालो सत्ता सञ्चालन गर्दै आएका शेख हसिना र खालिदा जियाको युगपछि बंगलादेशमा पहिलोपटक संसदीय निर्वाचन भएको हो । शेख हसिना २०२४ अगस्ट ५ मा भएको विद्यार्थी आन्दोलनपछि देश छाडेर भारत गएकी थिइन् भने खालिदा जियाको निधन भइसकेको छ । यस निर्वाचनले करिब ३५ वर्षपछि देशलाई नयाँ प्रधानमन्त्री दिनेछ ।

देशभरका ३६ हजार मतदान केन्द्रमा मतदान सम्पन्न भएको थियो । यसक्रममा खुलनास्थित एक मतदान केन्द्र बाहिर जमात–ए–इस्लामीका कार्यकर्तासँग भएको झडपमा बीएनपी नेता मोहिबुज्जमान कोचीको मृत्यु भएको छ । त्यस्तै, गोपालगन्ज सदर क्षेत्रमा भएको विस्फोटमा तीन जना घाइते भएको स्थानीय सञ्चारमाध्यमले जनाएका छन् ।

मतदानपछि अन्तरिम सरकारका प्रमुख मोहम्मद युनुसले “आज नयाँ बंगलादेशको जन्म भएको छ” भन्दै निर्वाचनलाई ऐतिहासिक बताएका छन् । अर्कोतर्फ पूर्वप्रधानमन्त्री शेख हसिनाले भने निर्वाचनलाई धाँधलीपूर्ण आरोप लगाउँदै रद्द गर्न माग गरेकी छन् । उनले अन्तरिम सरकार प्रमुख युनुसको राजीनामा समेत मागेकी छन् ।

यस चुनावमा शेख हसिनाको पार्टी अवामी लिगलाई सहभागिताबाट प्रतिबन्ध लगाइएको थियो ।