माङसेबुङ गाउँपालिकामा सरकारी कामकाज लिम्बू भाषामा चलाउने तयारी

इलाम । इलामको माङसेबुङ गाउँपालिकाले लिम्बू भाषालाई आधिकारिक कामकाजी भाषाका रूपमा लागू गर्ने तयारी अघि बढाएको छ ।

कोशी प्रदेश सरकारले लिम्बू र मैथिली भाषालाई सरकारी काममा प्रयोग गर्ने प्रक्रिया अघि बढाइरहेको बेला माङसेबुङले गाउँपालिकाभित्रैबाट लिम्बू भाषालाई कार्यालयीन प्रयोजनमा प्रयोग गर्न लागिएको हो । गाउँपालिका अध्यक्ष हेमन्त राईका अनुसार किरात श्रीजंगा लिपिमा लेखिने लिम्बू भाषालाई कामकाजमा लागू गर्न एक जना ‘भाषिक सहजकर्ता’ (सहायक पाँचौँ तह) नियुक्त गर्ने तयारी भएको छ ।

भाषिक सहजकर्ताका लागि आवेदन खुला गर्दा ६ जनाको दरखास्त परेको र अब आउने भदौ ४ गते लिखित÷छनोट परीक्षा सञ्चालन गरी नियुक्ति गरिने जनाएको छ ।

प्रमुख प्रशासकीय अधिकृत दिलसेर राईका अनुसार यो नियुक्ति ‘भाषा, संस्कृति र ललितकलाको संरक्षण तथा विकास कार्यान्वयन निर्देशिका–२०७५’ र ‘करारमा प्राविधिक कर्मचारी व्यवस्थापन कार्यविधि–२०७४’ बमोजिम हुनेछ । नियुक्त भएपछि उक्त सहजकर्ताले नेपाली–लिम्बू दुवै भाषामा अनुवादको जिम्मेवारी सम्हाल्नेछन् ।

गाउँपालिका भित्रै विशेष कार्यक्रम गरी लिम्बू भाषालाई आधिकारिक कामकाजको भाषाका रूपमा घोषणा गरिने अध्यक्ष राईले बताए । उनका अनुसार जातीय र भाषिक पहिचान संरक्षणको लागि नेपालमै पहिलोपटक माङसेबुङ गाउँपालिकाले सम्पूर्ण कार्यालयीन कामकाजमा लिम्बू भाषा लागू गर्न लागिएको हो ।

राष्ट्रिय जनगणना २०७८ अनुसार १६ हजार ८१० जनसंख्या रहेको यस गाउँपालिकामा ४२.८३ प्रतिशत लिम्बू र ३३.६ प्रतिशत राई समुदायको बसोबास छ । यसअघिदेखि नै माङसेबुङ–५ वडा कार्यालयले लिम्बू भाषामा कामकाज गर्दै आएको छ, जहाँ २०७६ सालदेखि चौथो तहका एक भाषा सहजकर्ता कार्यरत छन् ।