युद्धविरामपछि गाजाबाट इजरायली सेनाको आंशिक फिर्ता, बन्दी विनिमय प्रक्रिया अघि बढ्दै

गाजा । इजरायल र हमासबीच सहमतिपछि लागू भएको युद्धविरामसँगै इजरायली सेनाले शुक्रबार बिहान गाजाको केही भागबाट आफ्नो उपस्थिति आंशिक रूपमा घटाएको छ । सेनाले सहमतिअनुसार केही क्षेत्रमा पछि हटेको जनाएको छ, तर उनीहरूले अझै गाजा पट्टीको करिब आधा भूभाग नियन्त्रणमा राखेका छन् ।

यो युद्धविराम अमेरिकी राष्ट्रपति डोनाल्ड ट्रम्पको मध्यस्थतामा तयार गरिएको बन्दी फिर्ता तथा संघर्षविराम सम्झौताको पहिलो चरण अनुमोदन भएलगत्तै सुरु भएको हो । बाँकी चरणहरूबारे वार्ता जारी राखिएको जनाएको छ ।

बन्दी विनिमयको तयारी
सम्झौताअनुसार हमासले सोमबार दिउँसो १२ बजेभित्र सबै इजरायली बन्दीहरू रिहा गर्नुपर्नेछ । तीमध्ये २० जना जीवित र २८ जनासम्मको शव रहेको ठानिन्छ । यसको साटोमा इजरायलले आफ्ना जेलमा सजाय काटिरहेका करिब २५० प्यालेस्टिनी कैदीलाई मुक्त गर्ने योजना अघि बढाएको छ ।

मानवीय सहायता प्रवेशको अपेक्षा
युद्धविरामको सर्तअन्तर्गत गाजाका आम नागरिकका लागि अत्यावश्यक सहायता लिएर ट्रकहरू प्रवेश गरिनुपर्नेछ । शुक्रबारदेखि दैनिक झन्डै ६ सय ट्रक गाजामा भित्रिने अनुमान गरिएको छ, तर सहायता वितरणका ठोस व्यवस्थाबारे अझै स्पष्टता आइसकेको छैन ।

गत अगस्टमा संयुक्त राष्ट्रसमर्थित विज्ञहरूले गाजाको एक भागमा पहिलो पटक औपचारिक रूपमा अनिकाल घोषणा गरेका थिए । उनको मूल्याङ्कन अनुसार ५ लाखभन्दा बढी मानिस ‘विनाशकारी’ अवस्थाबाट गुज्रिरहेका छन् ।

अमेरिकी निगरानी टोली सारिँदै
यसबीच, अमेरिकी अधिकारीहरूले युद्धविरामको निगरानीका लागि मध्यपूर्वमा रहेका २०० जनासम्मका सैनिकहरू इजरायलतर्फ स्थानान्तरण गरिने बताएका छन् । इजरायली सेनाले पनि आफ्ना फौजहरू ‘नयाँ तैनाथी रेखामा जान थालेको’ पुष्टि गरेको छ । अमेरिकी विशेष दूतले यसलाई ‘पहेँलो रेखा’को नाम दिएका छन् । (बीबीसी)