छोरीले काजकिरिया गरेको भन्दै समाजको धम्की, बनेपाकी उपप्रमुखको दृढता

काभ्रे । मृत्युपछि बैतर्नी पार गर्न छोराले मात्र काजकिरिया गर्नुपर्छ भन्ने रुढीवादी मान्यता तोड्दै बनेपा नगरपालिकाकी उपप्रमुख विमला सापकोटा र उनका दुई बहिनीहरूले आफ्ना बुवाको दाहसंस्कार तथा किरियामा बसेका छन् । सामाजिक बहिष्कारको धम्कीका बीच पनि उनीहरूले यो कदम पछाडि हटाएर रोकिएनन् ।

९१ वर्षको उमेरमा आइतबार निधन भएका हरिप्रसाद सापकोटाका छोरा नभएकाले दागबत्ती कसले दिने भन्ने चर्चाका बीच विमला, निर्मला र राधिका — तीनै छोरीहरूले दाहसंस्कार गरि १३ दिनको किरिया बस्न थालेका हुन् ।

काजकिरिया गर्ने क्रममा समाजका केही व्यक्तिहरूले बहिष्कारको तयारी गरेको थाहा पाएपछि विमलाले सामाजिक सञ्जालमार्फत आक्रोश व्यक्त गरिन् । उनले लेखिन्— “महिलामाथिको विभेद कहिले अन्त्य हुन्छ ? आफ्नै बाउको काजकिरिया गर्दा सामाजिक बहिष्कारको बैठक भइरहेको छ । हामीले अरूको वंशमा दखल गरेका छैनौं, पीडामाथि पीडा थप्ने बहस तुरुन्त रोक्नुपर्छ ।”

उनले कानुन र संविधानविपरीत कदम चालिए प्रतिरोध गर्ने चेतावनी दिँदै बहिष्कार सहन तयार रहेको बताइन् । साथै, यो कार्यले हजारौं छोरीहरूका लागि न्याय हुने दाबी गरिन् । “१३ दिन बुवाको घरमा बस्छौं, त्यसपछि सदाका लागि माइतीको ढोका बन्द गरेर आफ्नै घर फर्कन्छौं,” उनले भनिन् ।

दिदीबहिनीहरूको यस साहसिक कदमलाई सामाजिक सञ्जालमा व्यापक समर्थन मिलेको छ । हजारौं पोस्टमार्फत धेरैले समानताको पक्षमा उनलाई शुभकामना र साथ प्रकट गरेका छन् ।

सरुमा परिवारका पुरोहितले छोरीहरूले काजकिरिया गर्न अनुमति दिएका थिए । तर समाजबाट पुरोहितलाई समेत बहिष्कार गर्ने धम्की आएपछि उनी पछि हटे । हाल अर्कै पुरोहितमार्फत काजकिरिया भइरहेको छ ।