ओलीको आरोपः “मदन भण्डारी फाउन्डेसन पाखण्डीको कब्जामा, ठगीको भाँडो बन्दै”

काठमाडौं । नेकपा (एमाले) का अध्यक्ष केपी शर्मा ओलीले आफूले स्थापना गर्न सहयोग गरेको मदन भण्डारी फाउन्डेसनमा पाखण्डीहरूको प्रभाव बढेको आरोप लगाएका छन् । उनले फाउन्डेसनलाई ‘ठगी खाने भाँडो’मा परिणत गरिएको दाबी गर्दै यसको वर्तमान नेतृत्वप्रति असन्तुष्टि प्रकट गरे ।

पार्टी मुख्यालय च्यासलमा ‘मदन–आश्रित स्मृति प्रतिष्ठान’का नवनियुक्त अध्यक्ष प्रदीप ज्ञवाली र पदाधिकारीहरूलाई सपथ ग्रहण गराउने कार्यक्रममा ओलीले फाउन्डेसनको गतिविधि मदन भण्डारीको विचार र आदर्श विपरीत रहेको टिप्पणी गरे ।

“पार्टीका सम्मानित नेताको नाममा बनेका संस्थाहरू सही बाटोमा हिँड्नुपर्छ,” ओलीले भने, “यो ठगी खाने भाँडो बन्ने परिपाटी हुनुहुँदैन । नेताको आदर्श पच्छ्याउन सक्नुपर्छ, होइन भने संस्थाको अस्तित्वको अर्थ रहँदैन ।”

अध्यक्ष ओलीका अनुसार, मदन भण्डारी फाउन्डेसन एमालेको आधिकारिक संस्था नभई सामूहिक पहलमा बनेको हो । “मदन भण्डारी र जीवराज आश्रितको जन्मदिन मनाउने अवसर नदिइएपछि हामीले मदन–आश्रित स्मृति प्रतिष्ठान बनाएका हौं,” उनले स्पष्ट पारे ।

फाउन्डेसनको भावी दिशा हेर्न बाँकी रहेको भन्दै ओलीले संस्थागत पारदर्शिता र सामूहिकता कायम राख्न आग्रह गरे । हाल उक्त फाउन्डेसनको अध्यक्षमा मदन भण्डारीकी छोरी उषाकिरण भण्डारी रहेका छन् ।