पक्राउ परे श्रीलंकाका पूर्व राष्ट्रपति रनिल विक्रमसिंघे

काठमाडौं । श्रीलंकाका पूर्व राष्ट्रपति रनिल विक्रमसिंघे सरकारी पैसाको दुरुपयोग गरेको आरोपमा पक्राउ परेका छन् । बीबीसी हिन्दीले श्रीलंकन प्रहरीलाई उद्धृत गर्दै उनको गिरफ्तारीबारे जनाएको हो ।

उनीमाथि लागेको आरोप सन् २०२३ को संयुक्त राष्ट्र महासभामा न्यूयोर्क भ्रमणपछि लण्डनमा निजी प्रयोजनका लागि रोकिँदा भएको खर्च सरकारी कोषबाट बेहोरेको भन्नेमा केन्द्रित छ । आरोपअनुसार, उनले पत्नीसमेतसँग लण्डनमा केही दिन बिताएका थिए ।

पक्राउ परेका विक्रमसिंघेलाई शुक्रबार कोलम्बोको मजिस्ट्रेट अदालतमा पेस गरिनेछ । त्यसअघि उनले आपराधिक अनुसन्धान विभाग (सीआईडी) मा बयान दिइसकेका छन् ।

आफूमाथि लागेको आरोप अस्वीकार गर्दै उनले लण्डन बसाइका क्रममा विभिन्न बैठक र छलफलमा सहभागी भएको दाबी गरेका छन् ।

विक्रमसिंघे सन् २०२२ देखि २०२४ सम्म श्रीलंकाको राष्ट्रपति बनेका थिए । आर्थिक संकट र जनविरोध चर्किएको बेला उनका पूर्ववर्ती गोटाबाया राजपक्षे देश छोडेपछि उनी राष्ट्रपतिको जिम्मेवारीमा पुगेका थिए ।