पाकिस्तानमा बाढले ३४४ को ज्यान लियो, डेढ सयभन्दा बढी बेपत्ता

बाबर (पाकिस्तान) । उत्तरपश्चिम पाकिस्तानमा मनसुनी वर्षासँगै आएको विनाशकारी बाढीले व्यापक जनधनको क्षति पुर्याउँदै कम्तीमा ३४४ जनाको ज्यान लिएको छ । प्रान्तीय विपद् व्यवस्थापन एजेन्सी (पीडीएमए) का प्रमुख असफान्डियार खट्टकका अनुसार अझै १५० भन्दा बढी मानिस बेपत्ता भएका छन् ।

हजारौँ सुरक्षाकर्मी र उद्धार टोलीले वर्षा र माटोको ढिस्काबीच भग्नावशेषमा फसेकाहरूको खोजीलाई तीव्र पार्दै राहत तथा उद्दार कार्य जारी राखेका छन् । “बुनेर जिल्लामा मात्र करिब १५० जना अझै सम्पर्कविहीन छन्, उनीहरू भग्नावशेष मुनि फसेका वा बढेको भेलले बगाएका हुन सक्छन्,” खट्टकले बताए ।

सबैभन्दा बढी क्षति बुनेर जिल्लामै भएको छ । यहाँका करिब १०–१२ गाउँ आंशिक रूपमा पुरिएका छन् भने २०८ जनाको मृत्यु पुष्टि भइसकेको छ । सङ्ला र अन्य पहाडी ग्रामीण भेगहरूबाट पनि दर्जनौँको मृत्यु र बेपत्ता भएको विवरण प्राप्त भएको पीडीएमएले जनाएको छ ।

खैबर पख्तुनख्वा प्रान्तका पहाडी भूभागमा शुक्रबार राति परेका अविरल वर्षापछि आएको आकस्मिक बाढी र पहिरोले घरहरू भत्किएको र सडकहरू अवरुद्ध गरेको क्षेत्रीय उद्धारसम्बन्धी प्रवक्ता बिलाल अहमद फैजीले जानकारी दिए । उनका अनुसार करिब दुई हजार उद्धारकर्मी नौ जिल्लामा परिचालित छन् ।

स्थानीय अधिकारी मोहम्मद सोहेलका अनुसार आधाभन्दा बढी अवरुद्ध सडकहरू खुलाइएको छ । सोही क्रममा दुर्गम क्षेत्रसम्म राहत सामग्री पुर्‍याउन सुरक्षाकर्मी, प्रहरी र उद्धारकर्मीहरूले लगातार प्रयास गरिरहेका छन् ।

कादर नगर गाउँमा सबैभन्दा ठूलो मानवीय क्षति भएको छ । विवाहको पूर्वसन्ध्यामा आएको बाढीले एक घरभित्रै पसेर २४ जना परिवार सदस्यको ज्यान लिएको छ । परिवारका प्रमुख उमर खान बाहिर भएकाले मात्र ज्यान जोगाउन सफल भएका हुन् । उनका चार आफन्त अझै बेपत्ता छन् ।

प्रान्तीय मुख्यमन्त्री अली अमिन गन्धापुरले घटनास्थल पुगेर मृतकका परिवारलाई प्रति परिवार दुई लाख पाकिस्तानी रुपैयाँ राहत दिने घोषणा गरेका छन् । उनले पाल, खानेकुरा र सुरक्षित पिउने पानीको आपूर्तिका लागि पनि निर्देशन दिएका छन् ताकि महामारी फैलिन नदिइयोस् ।

प्रधानमन्त्री शाहबाज सरिफले राहत कार्यलाई तीव्र बनाउन र बेपत्ताहरूको खोजीलाई प्राथमिकता दिन सम्बन्धित निकायलाई निर्देशन दिएका छन् । विपद् व्यवस्थापन प्राधिकरणले आगामी १७–१९ अगस्टमा थप वर्षा, बाढी र पहिरोको चेतावनी जारी गर्दै सतर्क रहन आग्रह गरेको छ ।

यो वर्ष जुन २६ देखि शुरू भएको मनसुनसँगै अहिलेसम्म पाकिस्तानभरि ६०० भन्दा बढीले ज्यान गुमाएका छन् । सन् २०२२ को विनाशकारी मनसुनी वर्षामा १,७०० जनाको मृत्यु भएको र लाखौँ घरहरू ध्वस्त भएको स्मरणीय छ ।

विशेषज्ञहरूको चेतावनीमा जलवायु परिवर्तनका कारण दक्षिण एसियामा हरेक वर्ष मौसमी विपत् थप घातक बन्दै गइरहेका छन् ।

यसैबीच, भारत–प्रशासित काश्मीरमा पनि भीषण वर्षापछिको आकस्मिक बाढीबाट क्षति भएको छ । कठुआ जिल्लामा ७ जनाको मृत्यु भएको छ भने ५ जना घाइते भएका छन् । किश्तवार जिल्लाको दुर्गम चोसिती गाउँमा आएको बाढीमा कम्तीमा ६० जनाको मृत्यु र १५० भन्दा बढी घाइते भएका छन् । घाइतेमध्ये करिब ५० जनाको अवस्था गम्भीर छ ।

तीर्थयात्रीहरू रहेका बेला आएको बाढीले ठूलो जोखिम निम्त्याएको अधिकारीहरूको भनाइ छ । हालसम्म ३०० भन्दा बढी व्यक्तिलाई उद्धार गरिएको छ भने करिब ४,००० तीर्थयात्रीलाई सुरक्षित स्थानमा सारिएको छ ।