युद्धपछि पहिलोपटक सार्वजनिक कार्यक्रममा देखिए इरानी सर्वोच्च नेता खामेनी

तेहरान । इजरायलसँगको तनावपूर्ण युद्धपछिको पहिलोपटक इरानका सर्वोच्च नेता अयातुल्लाह अली खामेनी सार्वजनिक कार्यक्रममा सहभागी भएका छन् ।

शनिबार, सिया मुस्लिम समुदायको अत्यन्तै पवित्र मानिने आशुराको पूर्वसन्ध्यामा खामेनी राजधानी तेहरानस्थित एक मस्जिदमा देखिएका हुन् । सरकारी टेलिभिजनमार्फत प्रसारित भिडियोमा उनी उपस्थित श्रद्धालुलाई अभिवादन गर्दै देखिन्छन् ।

यो सहभागिता विशेष मानिएको छ, किनकि इजरायलसँगको सशस्त्र झडपपछिका दिनमा खामेनी केवल रेकर्ड गरिएको भिडियो सन्देशमार्फत सार्वजनिक भएका थिए ।

गत जुन १३ मा इजरायली हवाई आक्रमणले इरानका उच्चपदस्थ सैन्य कमान्डर र आणविक कार्यक्रमसँग सम्बद्ध वैज्ञानिकहरूलाई लक्षित गरेपछि दुबै देशबीच तनाव चुलिएको थियो । त्यसयता, दुई पक्षबीच सीमित हवाई झडप समेत भएका थिए ।

यो द्वन्द्व १२ दिनपछि युद्धविराम घोषणासँगै रोकिएको हो ।

द्वन्द्वको अवधिमा खामेनी तीनपटक भिडिओ सन्देशमार्फत जनतामा देखिए पनि उनी भौतिक रूपमा सार्वजनिक नभएकाले बंकरमा लुकेका हुन् भन्ने अड्कल व्यापक रूपमा फैलिएको थियो ।

शनिबारको सार्वजनिक उपस्थिति खामेनीको स्वास्थ्य र नियन्त्रण यथावत् रहेको सन्देशका रूपमा हेरिएको छ । (एजेन्सी)