अमेरिकाको सान डिएगोस्थित मस्जिदमा गोलीकाण्ड, पाँच जनाको मृत्यु

काठमाडौं । अमेरिकाको क्यालिफोर्निया राज्यस्थित सान डिएगोमा रहेको एक मस्जिदमा भएको गोलीकाण्डमा तीन जनाको ज्यान गएको छ भने घटनामा संलग्न भएको आशंका गरिएका दुई किशोर पनि मृत फेला परेका छन् । स्थानीय सञ्चारमाध्यमहरूका अनुसार घटना क्लेरमोन्ट क्षेत्रमा रहेको ‘इस्लामिक सेन्टर अफ सान डिएगो’मा भएको हो ।

प्रहरीका अनुसार मस्जिदमा अचानक अन्धाधुन्ध गोली चल्दा त्यहाँ उपस्थित मानिसहरू त्रसित बनेका थिए । घटनास्थलमा खटिएका सुरक्षाकर्मीले आक्रमणकारीलाई रोक्ने प्रयास गरेका थिए । प्रहरी प्रमुख स्कट वाह्लले सुरक्षाकर्मीको साहसी कदमका कारण ठूलो मानवीय क्षति हुनबाट जोगिएको बताएका छन् ।

घटनापछि भागेका दुई किशोर संदिग्धहरू केही समयपछि नजिकै सडकमा गुडिरहेको कारभित्र मृत अवस्थामा भेटिएका थिए । प्रारम्भिक अनुसन्धानमा उनीहरूले आफैँलाई गोली हानेको हुनसक्ने आशंका गरिएको छ ।

प्रहरीले यो घटनालाई घृणाजन्य अपराधको कोणबाट अनुसन्धान गरिरहेको जनाएको छ । घटनाको सुरुवात भने एक महिलाले आफ्नो छोरा हराएको भन्दै प्रहरीमा उजुरी दिएपछि भएको थियो । ती महिलाले घरबाट केही हतियार र कारसमेत हराएको जानकारी गराएकी थिइन् ।

क्यालिफोर्नियामा भएको यस घटनाले स्थानीय मुस्लिम समुदायमा त्रास फैलाएको छ भने सुरक्षा व्यवस्था थप कडा पारिएको अधिकारीहरूले बताएका छन् ।