होर्मुज जलमार्गलाई लिएर अमेरिका–इरान तनाव चर्किंदै, समयसीमा सकिन २४ घण्टा मात्र बाँकी

काठमाडौं । विश्वकै अत्यन्त व्यस्त तेल ढुवानी मार्गमध्ये एक होर्मुज जलडमरूमध्य पुनः सञ्चालनको विषयमा अमेरिका र इरानबीच तनाव चर्किएको छ । अमेरिकी राष्ट्रपति डोनाल्ड ट्रम्पले इरानलाई दिएको अल्टिमेटम सकिन अब करिब २४ घण्टा मात्र बाँकी रहेको छ ।

राष्ट्रपति ट्रम्पले आइतबार आफ्नो सामाजिक सञ्जाल ‘ट्रुथ सोसल’मार्फत कडा चेतावनी दिँदै इरानलाई बिना शर्त जलमार्ग खोल्न आग्रह गरेका थिए । उनले तोकिएको समयभित्र मार्ग सञ्चालन नगरेमा इरानका ऊर्जा पूर्वाधारहरू लक्षित गरी आक्रमण गरिने चेतावनीसमेत दिएका छन् ।

मार्च २१ को राति गरिएको उक्त पोस्टअनुसार इरानलाई तेहरान समयअनुसार मार्च २४ बिहान ३:१४ बजेसम्मको समयसीमा दिइएको छ । यो समयसीमा नजिकिँदै जाँदा अन्तर्राष्ट्रिय समुदायको ध्यान पनि उक्त क्षेत्रमा केन्द्रित भएको छ ।

यता, इरानले अमेरिकी चेतावनीको कडा प्रतिवाद गर्दै आफू कुनै दबाबमा नझुक्ने स्पष्ट पारेको छ । तेहरानले यदि आफूविरुद्ध कुनै सैन्य कदम चालिएमा खाडी क्षेत्रमा रहेका अमेरिकी हित तथा तेलसम्बन्धी संरचनाहरूलाई निशाना बनाइने चेतावनी दिएको छ ।

विश्लेषकहरूका अनुसार होर्मुज जलडमरूमध्य विश्व ऊर्जा आपूर्तिको प्रमुख मार्ग भएकाले यहाँको अस्थिरताले विश्व बजारमा तेलको मूल्यमा ठूलो प्रभाव पार्न सक्छ । यस्तो अवस्थामा दुवै देशबीचको बढ्दो तनावले अन्तर्राष्ट्रिय व्यापार र ऊर्जा सुरक्षामा थप चुनौती सिर्जना गर्ने देखिएको छ ।

हालका घटनाक्रमले मध्यपूर्व क्षेत्रमा पुनः अस्थिरता बढ्ने संकेत देखाएको छ । कूटनीतिक प्रयासहरू सफल नभएमा स्थिति झनै जटिल बन्न सक्ने अनुमान गरिएको छ ।