निजामती तथा सार्वजनिक सेवामा कार्यरत कर्मचारीहरूको तलब वृद्धि गर्ने घोषणा

काठमाडौं । सरकारले आगामी आर्थिक वर्षको बजेटमार्फत निजामती तथा सार्वजनिक सेवामा कार्यरत कर्मचारीहरूको तलब वृद्धि गर्ने घोषणा गरेको छ । अर्थमन्त्री स्वर्णिम वाग्लेले बजेट प्रस्तुत गर्दै कर्मचारीहरूको आधारभूत तलबमा १० प्रतिशत वृद्धि गरिएको जानकारी दिए ।

अर्थमन्त्री वाग्लेले पछिल्ला चार वर्षदेखि राष्ट्रसेवक कर्मचारीहरूको तलब नबढेको र यस अवधिमा १७ दशमलब ३ प्रतिशतसम्म मूल्यवृद्धि भएको उल्लेख गर्दै कर्मचारीको जीवनयापनलाई सहज बनाउन तलब पुनरावलोकन गरिएको बताए ।

सरकारले आधारभूत तलबसँगै नयाँ तलबमानको १० प्रतिशत बराबर कार्यसम्पादनमा आधारित प्रोत्साहन भत्ता पनि दिने व्यवस्था गरेको छ । यसअघि दिइँदै आएको मासिक पाँच हजार रुपैयाँ महँगी भत्ता यथावत रहनेछ । यी सबै सुविधा जोड्दा कर्मचारीको कुल मासिक आम्दानी करिब २१ प्रतिशतसम्म बढ्ने सरकारको दाबी छ ।

नयाँ व्यवस्थाअनुसार कार्यालय सहयोगी स्तरका कर्मचारीको कुल मासिक पारिश्रमिक झन्डै ४० हजार रुपैयाँ पुग्नेछ भने मुख्यसचिवको मासिक आम्दानी एक लाख रुपैयाँ नजिक पुग्ने भएको छ ।

हाल ७७ हजार २११ रुपैयाँ आधारभूत तलब पाइरहेका मुख्यसचिवको तलब बढेर ८४ हजार ९३२ रुपैयाँ पुगेको छ । त्यसमा प्रोत्साहन भत्ता र महँगी भत्ता जोड्दा कुल मासिक पारिश्रमिक ९८ हजार ४२५ रुपैयाँ पुग्नेछ ।

त्यसैगरी, कार्यालय सहयोगीको आधारभूत तलब २७ हजार ६११ रुपैयाँबाट बढेर ३० हजार ३७२ रुपैयाँ पुगेको छ । महँगी भत्ता र प्रोत्साहन रकम जोडिएपछि उनीहरूको मासिक आम्दानी ३८ हजार ४०९ रुपैयाँ पुग्ने बताइएको छ ।

पेन्सनभोगी कर्मचारीहरूको हकमा भने आधारभूत तलबमा थपिएको रकमको दुईतिहाइ हिस्सा मात्रै समायोजन हुनेछ । त्यसअनुसार पूर्वमुख्यसचिवहरूको पेन्सन करिब पाँच हजार रुपैयाँसम्म बढ्ने अनुमान गरिएको छ ।

२०७९ सालमा सरकारले १५ प्रतिशत तलब वृद्धि गरेपछि कर्मचारीहरूको तलब पुनः बढाइएको थिएन । गत वर्ष भने सबै तहका कर्मचारीलाई समान रूपमा मासिक पाँच हजार रुपैयाँ महँगी भत्ता उपलब्ध गराइएको थियो ।

सरकारले नेपाल प्रहरी, सशस्त्र प्रहरी, नेपाली सेना, शिक्षक तथा सार्वजनिक संस्थानका कर्मचारीहरूको तलब पनि निजामती कर्मचारीकै अनुपातमा समायोजन हुने संकेत गरेको छ । विस्तृत नयाँ तलबमान र सुविधा विवरण भने केही दिनभित्र सार्वजनिक गरिने जनाइएको छ ।