जेनजी आन्दोलनः हालसम्म ३० जनाको मृत्यु, सयौं घाइते

काठमाडौं । जेनजी आन्दोलनका क्रममा हालसम्म ३० जनाले ज्यान गुमाएका छन् । स्वास्थ्य तथा जनसंख्या मन्त्रालयका अनुसार देशभरका विभिन्न २८ अस्पतालमा २५३ जना घाइतेको उपचार जारी छ ।

मन्त्रालयले दिएको विवरणअनुसार हालसम्म १,०३३ जना आन्दोलनकारी घाइते भएका छन् । तीमध्ये ७१३ जनालाई उपचारपछि घर पठाइएको छ भने ५५ जनालाई अन्य अस्पतालमा रेफर गरिएको छ ।

सबैभन्दा बढी चाप सिभिल अस्पतालमा
सिभिल अस्पतालमा मात्रै ४३६ जना घाइते भर्ना भएका थिए । तीमध्ये ३४४ जनालाई डिस्चार्ज गरिएको छ, ६ जनाको मृत्यु भइसकेको छ ।

नेसनल ट्रमा सेन्टरमा १६१ जना उपचारका लागि पुगेका थिए । ५८ जनाको उपचार अझै जारी छ भने ८ जनाले ज्यान गुमाएका छन् ।

बाँकेको भेरी अस्पतालमा पनि मृत्यु
बाँकेको भेरी अस्पतालमा २८ जना घाइते भर्ना भएका थिए, जसमा ५ जनाको मृत्यु भएको मन्त्रालयले जनाएको छ ।

अहिलेसम्मको विवरण अनुसार आन्दोलनले गम्भीर मानवीय असर पारिरहेको छ । मन्त्रालयले अझै पनि अस्पतालहरूमा घाइतेहरूको उपचार जारी रहेको जनाएको छ ।