गाजाबाट चारजना मृतक बन्धकका शव फिर्ता, विपिन जोशीको पनि समावेश

काठमाडौं । इजिप्टमा गाजासम्बन्धी शिखर सम्मेलन चलिरहेका बेला इजरायली प्रधानमन्त्री बेन्जामिन नेतन्याहू अनुपस्थित रहे । यसैबीच, हमासले गाजाबाट चारजना मृतक बन्धकका शव रेडक्रसमार्फत फिर्ता गरेको छ । ती शवहरूमध्ये एक नेपाली युवक विपिन जोशीको समेत रहेको पुष्टि भएको छ ।

हमासले रेडक्रसलाई जुन चार शवहरू हस्तान्तरण गर्‍यो, तीमा नेपाली नागरिक विपिन जोशी, इजरायली नागरिक गाइ इलौज, योसी शाराबी र इजरायली सेनाका क्याप्टेन ड्यानियल पेरेज परेका छन् । शवहरू सोमबार साँझ दक्षिण गाजाबाट फिर्ता गरिएका हुन् ।

इजरायली डिफेन्स फोर्स (आईडीएफ) का अनुसार शवहरूलाई तेल अभिभस्थित अबु कबीर फरेन्सिक इन्स्टिच्युट पुर्‍याइनेछ । त्यहाँ शवहरूको डीएनए परीक्षण तथा फरेन्सिक प्रक्रियाद्वारा पहिचान गरिनेछ, जसमा दुई दिनसम्म लाग्न सक्ने जनाइएको छ ।

आइडीएफले शवहरू निकाल्नुअघि गाजामै धार्मिक श्रद्धाञ्जली समारोह आयोजना गर्ने जनाएको छ । उक्त कार्यक्रममा सैनिक रब्बीको नेतृत्वमा कफिनहरू इजरायली झण्डामा बेरिने छन् । सैनिकहरूले सलामी दिने र स्तोत्र वाचन गर्नेछन् ।

यसबीच, हमास र अन्य पक्षबीचको सहमतिअनुसार २ हजारभन्दा बढी प्यालेस्टिनी कैदीहरू रिहा गरिएको छ । तीमध्ये २५० जना आजीवन कैदको सजाय पाएका थिए । यो घटनालाई मानवता र राजनीतिक सन्देशका रूपमा लिइएको छ ।