जापानको तल्लो सदन निर्वाचनमा एलडिपीको ऐतिहासिक बहुमत, प्रधानमन्त्री ताकाइचीको सशक्त उदय

काठमाडौं । जापानमा आइतबार सम्पन्न जापानको तल्लो सदन निर्वाचनमा प्रधानमन्त्री सानाए ताकाइची नेतृत्वको लिबरल डेमोक्रेटिक पार्टी (एलडिपी) ले अभूतपूर्व सफलता हात पारेको छ । एलडिपीले एक्लै ३१६ सिट जित्दै जापानी संसदीय इतिहासमै नयाँ कीर्तिमान कायम गरेको हो ।

यसअघिको संसदमा १९८ सिटमा सीमित रहेको एलडिपीले यस निर्वाचनमा उल्लेखनीय फड्को मार्दै ठूलो बहुमत हासिल गरेको छ । ४६५ सिट रहेको तल्लो सदनमा दुई तिहाइ बहुमतका लागि ३१० सिट आवश्यक पर्ने भए पनि एलडिपीले त्यो सीमा एक्लैले पार गरेको छ ।

एलडिपीसँग गठबन्धन गरेको जापान इनोभेसन पार्टीले ३६ सिट जितेको छ । यससँगै सत्तारुढ गठबन्धनको कुल सिट संख्या ३५२ पुगेको छ, जसले सरकारलाई संसदमा झनै बलियो बनाएको छ ।

यो विजय सन् १९५५ मा एलडिपी स्थापना भएयताकै सबैभन्दा ठूलो जित हो । यसअघि सन् १९८६ मा तत्कालीन प्रधानमन्त्री यासुहिरो नाकासोनेले हासिल गरेको ३०० सिटको रेकर्डलाई प्रधानमन्त्री ताकाइचीले तोडेकी हुन् ।

निर्वाचनमा विपक्षी दलहरू भने ठूलो घाटामा परेका छन् । मुख्य विपक्षी सेन्टर रिफर्म कोलिसनले जम्मा ४९ सिट मात्र प्राप्त गरेको छ, जबकि अघिल्लो निर्वाचनमा सो दलसँग १७२ सिट रहेको थियो । यसले जनमत सत्तारुढ गठबन्धनतर्फ स्पष्ट रूपमा सरेको संकेत गरेको छ ।

अन्य साना दलहरूले एलडिपी गठबन्धन बाहिर ११३ सिट जितेका छन् । यद्यपि, संसदको शक्ति सन्तुलनमा उनीहरूको प्रभाव सीमित देखिएको छ ।

प्रधानमन्त्री ताकाइचीले यही जनवरी २३ मा संसदको तल्लो सदन विघटन गर्दै १६ दिनभित्र निर्वाचन गराउने घोषणा गरेकी थिइन् । छोटो समयमै भएको निर्वाचनमा उनले जनताबाट बलियो समर्थन पाउन सफल भएकी छन् ।

ताकाइचीका प्रमुख चुनावी एजेण्डामा संविधान संशोधन, राष्ट्रिय सुरक्षाका लागि बलियो सेना निर्माण, तथा खाद्यान्नमा लाग्दै आएको ८ प्रतिशत कर हटाउने प्रस्ताव रहेका छन् । यी नीतिगत प्रतिबद्धताले आगामी दिनमा जापानको राजनीति र अर्थतन्त्रमा महत्वपूर्ण प्रभाव पार्ने अपेक्षा गरिएको छ ।