एक सातापछि जीवित फेला परेका शेर्पाको स्वास्थ्यमा सुधार

काठमाडौं । सगरमाथा आधार शिविर क्षेत्रमा बेपत्ता भएर एक सातापछि जीवितै उद्धार गरिएका पर्वतारोहण गाइड दावा शेर्पाको स्वास्थ्य अवस्थामा क्रमिक सुधार भइरहेको छ ।

उपचाररत ह्याम्स अस्पतालले शुक्रबार जारी गरेको विज्ञप्तिअनुसार ५७ वर्षीय शेर्पालाई अस्पताल ल्याउँदा गम्भीर डिहाइड्रेसन (शरीरमा पानीको कमी), दुवै हातका कान्छी औँलामा दोस्रो चरणको शीतदंश (फ्रोस्टबाइट), दाहिने हातको बुढी औँला र बीचको औँलामा पहिलो चरणको शीतदंश देखिएको थियो । साथै, उनको दाहिने खुट्टाको घुँडानजिकको फेमोरल कन्डायल हड्डी भाँचिएको र तिघ्रामा रक्तस्रावका कारण हेमाटोमा बनेको अस्पतालले जनाएको छ ।

हाल शेर्पाको अस्पतालको सघन उपचार कक्ष (आईसीयू) मा उपचार भइरहेको छ । उनको उपचारमा फ्रोस्टबाइट नियन्त्रणका लागि इन्ट्राभेनस इलोप्रोस्ट थेरापी, अक्सिजन, सलाइन तथा अन्य आवश्यक सहयोगात्मक उपचार समावेश गरिएको छ ।

अस्पतालका अनुसार शेर्पाको स्वास्थ्य अवस्था स्थिर रहेको छ भने डिहाइड्रेसनमा उल्लेखनीय सुधार देखिएको छ । विभिन्न विधाका विशेषज्ञ चिकित्सकहरूको टोलीले उनको निरन्तर निगरानी गरिरहेको छ ।

ह्याम्स अस्पतालका कार्यकारी निर्देशक डा. ज्योतिन्द्र शर्माले शेर्पालाई थप केही दिन आईसीयूमा राखेर उपचार तथा निगरानी गरिने जानकारी दिएका छन् ।

अस्पतालले आवश्यकताअनुसार शेर्पाको स्वास्थ्य अवस्थाबारे थप जानकारी सार्वजनिक गर्दै जाने जनाएको छ ।

शेर्पा ओखलढुंगास्थिति खिजीदेम्बा गाउँपालिका वडा नं. ६ का स्थायी बासिन्दा हुन् ।