मतपत्र छपाइ अन्तिम चरणमा, २५ जिल्लाको प्याकिङसमेत सकियो

काठमाडौं । निर्वाचन आयोगले प्रत्यक्षतर्फको निर्वाचनका लागि ६० जिल्लाका मतपत्र छपाइको काम पूरा गरेको छ । तीमध्ये २५ जिल्लाका मतपत्र प्याकिङसमेत भइसकेको आयोगले जनाएको छ ।

आयोगका अनुसार डोल्पा, मुगु, जुम्ला, कालिकोट, हुम्ला, जाजरकोट, दैलेख, रुकुम (पश्चिम भाग), सल्यान, सुर्खेत, बाजुरा र अछाम जिल्लाका मतपत्र छपाइ तथा प्याकिङको काम सम्पन्न भइसकेको छ ।

यस्तै, बझाङ, डोटी, डडेल्धुरा, दार्चुला, बैतडी, कैलाली, कञ्चनपुर, पाँचथर, इलाम, तेह्रथुम, भोजपुर, ओखलढुङ्गा र सुनसरीसहित जम्मा २५ जिल्लामा छपाइ र प्याकिङ दुवै प्रक्रिया पूरा भइसकेको आयोगले जानकारी दिएको छ ।

समानुपातिक निर्वाचन प्रणालीतर्फको मतपत्र छपाइ भने यसअघि नै सम्पन्न भइसकेको छ । उक्त प्रणालीअन्तर्गत कुल दुई करोड आठ लाख ३० हजार मतपत्र छपाइ गरी प्याकिङ र रुजु गरेर ढुवानीका लागि तयारी अवस्थामा राखिएको छ ।

प्रत्यक्ष निर्वाचनतर्फ भने दुई करोड तीन लाख २३ हजार मतपत्र छपाइ गर्नुपर्नेमा माघ १६ गतेदेखि छपाइ सुरु गरिएको थियो । साथै, १० लाख ९८ हजार २०० वटा नमूना मतपत्र छपाइ गरी विभिन्न जिल्लामा पठाइसकिएको आयोगले जनाएको छ ।

आयोगका अनुसार प्रत्यक्षतर्फको मतपत्र छपाइको काम अहिले अन्तिम चरणमा पुगेको छ भने प्याकिङको प्रक्रिया पनि क्रमशः अघि बढिरहेको छ ।

मतपत्र छपाइको काम जनक शिक्षा सामग्री केन्द्र लिमिटेडमा भइरहेको छ ।